Фото: aikyn.kz
Павлодар облысының соты Виктор мен Данила Долгалёвты 917 мың тоннадан астам титан-цирконий кенін заңсыз өндірді деп айыпты деп таныды. Бұл туралы Informburo.kz-ке сілтеме жасап Ult.kz хабарлайды.
Мемлекетке келтірілген залал — шамамен 4 триллион теңге. Кен өндіру келісімшарт бұзылғаннан кейін де бақылаудағы құрылымдар арқылы жалғасқан, ал экспорт Қытай мен басқа елдерге «көлеңкелі» схемалармен жүзеге асырылған.
Сот үкімі бойынша:
Виктор Долгалёв — 11 жылға бас бостандығынан айырылды;
Данила Долгалёв — рақымшылықты ескере отырып, 4 жыл 9 айға сотталды;
Адвокат пен делдал — пара беруге итермелеу және алаяқтық үшін әрқайсысы 10 жыл алды.
Істе Тайынша ауданының әкімдігі мен Индустрия және инфрақұрылымдық даму министрлігі жәбірленуші ретінде танылды. Олардың 4 триллион теңгеге берілген талап-арызы толық қанағаттандырылды.
Бұған дейін іс Солтүстік Қазақстан облысында алқа билердің қатысуымен қаралған, алайда ақтау үкімі апелляция сатысында күшін жойған еді.
