04 қаз, 2024 сағат 15:20

59 елде жүрген қазақстандықтар республикалық референдумға қатыса алады

Фото: pixabay.com

59 елде жүрген қазақстандықтар республикалық референдумға қатыса алады. Бұл туралы ҚР СІМ өкілдері мәлім етті, деп хабарлайды Ult.kz.

"ҚР Президентінің ү.ж. 2 қыркүйектегі № 636 Жарлығына сәйкес 2024 жылғы 6 қазанда Қазақстанда атом электр станциясын салу бойынша жалпыреспубликалық референдум өтеді. Дауыс беруге қатысу үшін белсенді сайлау құқығы бар, тиісті шет мемлекетте тұратын немесе жеке, қызметтік, оқу, іскерлік пен туристік мақсатпен жүрген және ҚР азаматының жарамды паспорты бар Қазақстан Республикасының азаматтары референдум учаскесі құрылған Қазақстанның дипломатиялық немесе консулдық өкілдігіне жүгіне алады", - делінген СІМ хабарында.

ҚР-дың шетелдегі мекемелерінде дауыс беру «Қазақстан Республикасындағы сайлау туралы» ҚР Конституциялық заңының 38-ші бабының 1-ші тармағына сәйкес референдум өткізілетін күні (2024 жылғы 6 қазан, жексенбі) жергілікті уақыт бойынша сағат 07:00-ден 20:00-ге дейін өткізілетіні айтылады.

Шетелде жүрген азаматтар СІМ сайтынан референдум өткізілетін орындардың мекенжайын көре алады.