شىعىس قازاقستان وبلىسىندا پوليتسييا قىزمەتكەرلەرٸ ينتەرنەت-الاياقتاردىڭ ارباۋىنان 87 جاستاعى زەينەتكەردٸ قۇتقارىپ قالدى. وپەراتيۆتٸ ەرەكەتتٸڭ ارقاسىندا قارييانىڭ شامامەن 1,4 ملن تەڭگەسٸ ساقتالىپ قالدى, دەپ حابارلايدى ult.kz.
Polisia.kz جازۋىنشا, وقيعا ٶسكەمەن قالاسىندا بولعان. بەلگٸسٸز تۇلعالار ٶزدەرٸن قۇقىق قورعاۋ ورگاندارى مەن بانك قىزمەتكەرلەرٸ رەتٸندە تانىستىرىپ, زەينەتكەردٸ اقشاسىن «قاۋٸپسٸز شوتقا» اۋدارۋعا كٶندٸرۋگە تىرىسقان.
الاياقتار تەلەفون ارقىلى سٶيلەسۋ بارىسىندا ەگدە جاستاعى ەيەلگە پسيحولوگييالىق قىسىم كٶرسەتٸپ, قورقىتۋ تەسٸلدەرٸن قولدانعان. سونىڭ سالدارىنان تۇرعىن ٸرٸ كٶلەمدەگٸ قاراجاتىنان ايىرىلىپ قالۋ قاۋپٸنە تاپ بولعان.
الايدا ٶسكەمەن قالالىق پوليتسييا باسقارماسىنىڭ قىزمەتكەرلەرٸ دەر كەزٸندە ارالاسىپ, الاياقتىق ەرەكەتتٸڭ الدىن الدى. پوليتسەيلەر وقيعا ورنىنا جەدەل جەتٸپ, زەينەتكەرگە تٷسٸندٸرۋ جۇمىستارىن جٷرگٸزٸپ, ونى سابىرعا شاقىرعان. سونىمەن قاتار تەرتٸپ ساقشىلارى الاياقتارمەن تەلەفون ارقىلى بايلانىسقا شىعىپ, ولاردىڭ جوسپارىن جٷزەگە اسىرۋعا مٷمكٸندٸك بەرمەگەن.
قۇقىق قورعاۋشىلار ازاماتتارعا بانك قىزمەتكەرلەرٸ, پوليتسييا نەمەسە ٶزگە دە مەملەكەتتٸك ورگاندار تەلەفون ارقىلى اقشا اۋدارۋدى تالاپ ەتپەيتٸنٸن ەسكەرتەدٸ. سونداي-اق مۇنداي جاعدايدا SMS-كودتار, بانك كارتاسىنىڭ دەرەكتەرٸ نەمەسە جەكە مەلٸمەتتەر سۇرالمايتىنىن اتاپ ٶتتٸ.
پوليتسييا كٷمەندٸ قوڭىراۋلار تٷسكەن جاعدايدا ەڭگٸمەنٸ بٸردەن توقتاتىپ, قۇقىق قورعاۋ ورگاندارىنا حابارلاسۋعا شاقىرادى.
