Батыс Қазақстан облысында Бәйтерек ауданы тұрғыны полицияға пара бергені үшін ұсталды, деп хабарлайды ҚазАқпарат.
БҚО полиция департаментінің ресми өкілі Болатбек Нұрғожиннің мәлім еткеніндей, Дариян ауылында П. деген күдіктіге жалған құжаттар дайындамақ болғаны үшін айып тағылған.
ҚР ҚК 385-бабы 3-бөлігіне сәйкес қылмыстық жауапкершілікке тартылмау үшін аталмыш тұрғын Приурал полиция бөлімі тергеу бөлімінің бастығына келіп, 300 мың теңге және 50 АҚШ доллары көлемінде пара ұсынған.
«Аталған эпизод полиция қызметкерлерінің барлық кабинеттерінде орнатылған бейнебақылау камераларымен тіркелген. Тергеу бөлімінің бастығы оқиға туралы дереу баянат жазып, пара берушіні ұстады. Оған қатысты ҚР ҚК 367-бабына (пара беру) сәйкес сотқа дейінгі тергеу амалдары жүргізілуде», - деді Нұрғожин.
985 рет оқылды
