Almatyda 19 mamyr kúni jumbaq jaǵdaida joǵalyp ketken 25 jastaǵy jigittiń máiiti tabyldy, dep habarlaidy ult.kz.
Týystarynyń aitýynsha, Erzat Egizbai qurylys nysanynda geodezistiń kómekshisi bolyp jumys istegen. Ol iz-tússiz joǵalar kúni ádettegidei jumysqa ketken, alaida úiine qaita oralmaǵan. Túski saǵat eki shamasynda ol basshysynan dúkenge baryp kelýge suranyp, shyǵyp ketken eken. Keiin Erzat avtobýsqa otyryp, Eńbekshiqazaq aýdanyndaǵy Kosmos aýylyna qarai bet alǵan. Onyń uialy telefony sońǵy ret dál sol mańda tirkelgen.
Joǵalǵan jigittiń anasy beinebaqylaý kameralaryna Erzattyń Raiymbek dańǵylyndaǵy metro stantsiiasynan túsip, keiin kósheniń arǵy betine shyqqany túsip qalǵanyn aitty. Kadrlarda onyń jan-jaǵyna qarap, bireýdi izdegendei bolǵany baiqalady. Osydan keiin ol avtobýsqa minip ketip qalǵan.
Týystarynyń aitýynsha, Erzat buǵan deiin úiden eskertýsiz ketpegen. Olardyń sózinshe, onyń jumysta da, otbasynda da eshqandai janjal bolmaǵan. Sonymen qatar esh jerde esepte turmaǵan jáne qylmystyq jaýapkershilikke tartylmaǵan.
Marqumdy quqyq qorǵaý organdarynyń qyzmetkerleri men eki iri eriktiler uiymy izdestirgen.
Eriktiler uiymdarynyń biri áleýmettik jelide jigittiń qaza tapqany týraly habarlady.
«Marqumnyń týǵan-týystary men jaqyndaryna qaiǵyra kóńil aitamyz. Bul aýyr qasiretti eńserýge kúsh pen sabyr tileimiz. Ókinishke qarai, izdeý jumystary qaraly habarmen aiaqtaldy», - delingen habarlamada.
