Belgili horeograf Ánel áleýmettik jelide óz komandasynyń Mottyń kontsertinde óner kórsetýi tiis bolǵanyn aitty. Alaida uiymdastyrýshylardyń dóreki qarym-qatynasyna bailanysty bul oidan bas tartqan eken, dep habarlaidy ult.kz.
«Búgin meniń komandam Mottyń kontsertinde bileý kerek edi. Biraq biz bas tarttyq. Birinshiden, bul salada uzaq ýaqyt júrgen adammyn jáne bizdegi kontsertter qalai ótetinin, uiymdastyrýshylardyń qalai jumys jasap júrgenin jaqsy bilemin. Sondyqtan qonaq bolyp kelgen jerde syilastyq bolý kerek dep esepteimin! Oiymdy jinaqtap múmkin aitarmyn durystap», - dep jazdy ol.
Bishiniń aitýynsha, ánshiniń menedjeri olarǵa dóreki sóilep, qysym kórsetip, ózin joǵary ustaǵan. Osydan keiin komanda kontsertke qatyspaý týraly sheshim qabyldaǵan.
Oqiǵaǵa qatysty taǵy bir bishi Anna da pikir bildirdi. Onyń sózinshe, komanda Mottyń kontsertinde tegin óner kórsetýge kelisken. Olar muny kásibi qyzyǵýshylyq úshin jasaǵanyn aitqan. Alaida kontsert alańynda ártistiń menedjmenti tarapynan qatty qysym kórgen.
Soǵan qaramastan, janjaldyń naqty neden shyqqany ázirge belgisiz. Jariialanymdarda tek «qurmetsizdik» pen «kásibilikke sai emes qarym-qatynas» týraly aitylǵan. Janjaldyń naqty sebebi ashyq kórsetilmegen.
Bul jazbalar áleýmettik jelide qyzý talqyǵa tústi. Alaida naqty málimettiń bolmaýyna bailanysty jeli qoldanýshylarynyń pikiri ekige bólindi. Keibiri janjaldyń mán-jaiyn tolyq túsindirýdi talap etse, endi bir bóligi horeografty tolyq qoldap otyr. Olardyń pikirinshe, eger Mottyń komandasy jergilikti ártisterge shynymen qurmetsizdik tanytqan bolsa, onda kontsertten bas tartý durys sheshim.
«Motqa boikot jariialamas buryn, jaǵdaidy tolyq túsinip alý kerek».
«Ne aitqylaryńyz kelgenin túsinbei jatyrmyz».
«Naqty ne bolǵanyn qarapaiym tilmen jazýǵa bolmai ma? Kimniń ne istegeni múlde túsiniksiz».
Ázirge Mot te, Almatydaǵy kontsertti uiymdastyrýshylar da bul jaǵdaiǵa qatysty resmi pikir bildirgen joq.
