Biyl Qurban ait 27 mamyrda bastalady. Qazaqstan musylmandary dini basqarmasy tóraǵasy, Bas múfti Naýryzbai qajy Taǵanuly Qurban aittyń tek dini mereke emes, qoǵamdaǵy birlik pen janashyrlyqty kúsheitetin rýhani meiram ekenin aitty, dep habarlaidy ult.kz.
Onyń sózinshe, bul kúnderi qaiyrymdylyq jasaý, muqtaj jandarǵa kómek berý, renjisken adamdardyń tatýlasýy jáne úlkenge qurmet kórsetý sekildi izgi qundylyqtar dáriptelýi kerek.
— Halqymyz ejelden Qurban aitty erekshe daiyndyqpen qarsy alǵan. Maldyń eń jaqsysyn qurbandyqqa shalyp, etin muqtaj jandarǵa taratý, qonaq kútý, úlkenniń batasyn alý — ult dástúrindegi asyl qundylyqtar, — dedi Bas múfti.
Sondai-aq, ol mereke kezinde elimizdiń barlyq óńirinde ulttyq dástúr men dini sabaqtastyqty nasihattaityn is-sharalar uiymdastyrylatynyn aitty. Meshit aýlalarynda kiiz úiler tigilip, ulttyq sport túrlerinen jarystar men mádeni-rýhani keshter ótedi.
Naýryzbai qajy Taǵanuly kásipkerlerge de arnaiy úndeý jasap, Qurban aitty paida tabatyn naýqanǵa ainaldyrmaýǵa shaqyrdy.
— Qurban ait — tabys túsiretin mereke emes. Ásirese, mal saýdasymen ainalysatyn azamattar baǵany negizsiz kótermei, halyqtyń áleýmettik jaǵdaiyn eskergeni jón, — dedi ol.
Budan bólek, Qazaqstan musylmandary dini basqarmasy birneshe jyldan beri jumys istep kele jatqan qurban.muftyat.kz onlain platformasynyń qyzmeti týraly da málimdedi. Joba arqyly azamattar qurbandyq shalýǵa onlain tapsyrys berip, tólem jasap, rásimniń oryndalýyn qashyqtan baqylai alady. Qurbandyq shalynǵannan keiin tapsyrys berýshige SMS habarlama men beineesep joldanady.
Al QMDB-nyń Shariǵat jáne pátýa bóliminiń meńgerýshisi Sansyzbai qajy Qurbanuly qurban shalýdyń dini talaptaryn túsindirdi. Onyń aitýynsha, qurbandyqqa qoi, eshki, siyr jáne túie shalynady. Qoi men eshki bir jastan, siyr eki jastan, túie bes jastan asqan bolýy kerek.
Sonymen qatar, Ermek qajy Qasbolatuly Astanada qurban shalý rásimi arnaiy belgilengen oryndarda — «Big Shanhai», «Barakat» jáne «Jailaý» bazarlarynda ótetinin aitty.
