Foto: gov.kz
Sý tasqynynan zardap shekken Batys Qazaqstan óńirinen 17 sáýir kúni 103 oqýshy men 10 jetekshi "Qambash" olipiadalar jáne qosymsha bilim berý ortalyǵyna kelgen bolatyn, dep habarlaidy «Ult aqparat» inbusiness.kz-ke silteme jasap.
Balalar jaily bólmelerge ornalasqan. Ortalyqta barlyq jaǵdai jasalǵan. Jatyn oryndarda sanitarlyq tazalyq jumystary júrgizilip, 5 mezgil ystyq tamaq uiymdastyrylýda.
Balalardyń ystyq tamaǵyna Qyzylorda qalasynyń kásipkeri demeýshilik jasasa, oqý protsesin uiymdastyrýǵa Aral aýdandyq bilim bólimi janynan jasaqtalǵan volonter-muǵalimder, atap aitsaq, №73 "Amanótkel", №21 "Qambash", №67 "Qosjar", №20 "Bógen", №63 "Aqbai" mektepteriniń qyzmetkerleri atsalysýda. Sonymen qatar, ortalyq mamandary dene shynyqtyrý, mýzyka sabaqtaryn, "Qarjylyq saýattylyq" kýrsyn, psihologiialyq jumys jáne tárbie saǵattaryn keste boiynsha ótkizedi. Tústen keiingi aýysymda "Sheber qoldar", "Voleibol", "Fýtbol", "Qambash Media", "Beineleý", "Bi", "Robototehnika" úiirmeleri jumys jasaýda.
Balalar sabaqpen qatar tárbie sharalaryna da qatysýda. Kúndiz uzaq úzilis kezinde túrli oiyndar oinatylsa, keshkilik "Bile, Qambash", "Ertegiler elinde", "KinoKesh", "Bolmasań da uqsap baq" siiaqty baiqaýlar ótýde.
Demalys kúni oraldyq oqýshylar Aral qalasyna saiahattady. Aldymen aýdandyq tarihi-ólketaný mýzeiindegi qundy jádigerlermen tanysty. Balyqshylar alleiasyndaǵy "Balyqshylar monýmenti", kemeler janynda estelikke fotoǵa tústi. Ábdijámil Nurpeiisovtyń ádebiet úiinde jazýshynyń shyǵarmalary týraly keńirek bildi. Saiahat kezinde Aral qalasynyń kásipker qyzdary daiyndaǵan dastarhanynan dám tatyp, Aral aýdandyq oqýshylar úii tárbielenýshileriniń kontsertin tamashalady.
