103 jastaǵy amerikalyq áiel uzaq ómir súrý qupiiasyn bólisti. Onyń aitýynsha, uzaq ómir súrýge kómektesetin ádetterdiń biri karta oinaý, dep habarlaidy ult.kz.
Doroti Ýilson 1923 jyldyń 12 qańtarynda AQSh-tyń Massachýsets shtatyndaǵy Arlington qalasynda dúniege kelgen. Qazir ol Mistik qalasyndaǵy qarttar ortalyǵynda turady. Keiýananyń kún tártibi óte tyǵyz. Ol fitnes jattyǵýlaryna qatysady, shirkeýge barady, qoǵamdyq sharalarǵa qatysyp, karta oiyndary boiynsha týrnirlerge de atsalysady.
Ýilson óziniń basty hobbii adamdarmen aralasý ekenin aitqan.
«Ómirdiń eń jaqsy tusy jolyqtyrǵan adamdaryń», - deidi ol.
Sonymen qatar Doroti qarttar ortalyǵyna jańadan kelgen adamdardy beiimdeýmen ainalysatyn komitettiń múshesi. Onyń pikirinshe, ár adam ózine qamqor bolatyn jan bar ekenin sezinýi kerek.
Ýilson 103 jasynda ózin sergek ári baqytty sezinýge kómektesetin bes qarapaiym ádetti atady.
Birinshisi, fizikalyq belsendilik. Ol kún saiyn tósekten ózi turyp, kiinip, toptyq jattyǵýlarǵa qatysady.
Ekinshisi, kitap oqý. Qariia kún saiyn elektrondy kitap oqyp, tarihtaǵy uqsas oqiǵalardy baiqaǵandy unatady.
«Adamzat qatelikterden eshqashan sabaq almaidy, biraq báribir tyrysý kerek», - deidi ol.
Úshinshisi, adamdarmen jii aralasý.
Tórtinshisi, karta oinaý. Ýilson aptasyna bir ret offlain túrde bridj oinaidy. Al kún saiyn eki balasymen onlain oinaidy.
«Bul óte qyzyq. Bridj arqyly keremet adamdarmen tanysasyń», - deidi amerikalyq keiýana.
Besinshisi - durys tamaqtaný. Uzaq jasaǵan áiel teńiz ónimderin jaqsy kóredi jáne kún saiyn salat ne kókónis jeidi.
«Men ózimdi únemi jaqsy sezinemin. Nege olai bolmasqa? Ómirge shaǵymdanýdan paida joq», - dedi Doroti Ýilson.
