Biyl Almatyda jaz erekshe ystyq bolýy múmkin. Sinoptikterdiń boljamynsha, maýsym aiynda aýa temperatýrasy +41 gradýsqa deiin kóterilip, qalada jańa rekord tirkelýi yqtimal, dep habarlaidy ult.kz.
“Qazgidromet” mamandary sońǵy jyldary ekstremaldy aýa raiy qubylystary jiilep ketkenin aitady. Osyǵan bailanysty biyl Almatyda buryn-sońdy bolmaǵan aptap kúnder bolýy ǵajap emes.
Meteorologiialyq boljamdar bóliminiń basshysy Dáýlet Kisebaevtyń sózinshe, qalada kem degende bir kún temperatýralyq rekord jańarýy múmkin. Buǵan deiin Almatydaǵy eń joǵary temperatýra 1983 jyly tirkelip, synap baǵany +43 gradýsqa deiin jetken edi.
Sinoptikterdiń aitýynsha, bulttyń az bolýy men jeldiń baiaý soǵýy ystyqty burynǵydan da aýyr sezdirýi yqtimal. Mundai kúnderi Almatyda aýa ainalymy baiaýlap, ziiandy qaldyqtar qala ústinde jinalyp qalýy múmkin. Sonyń saldarynan megapolisti tútin tumany basyp, aýa sapasy kúrt nasharlaýy ǵajap emes.
Mamandar turǵyndarǵa kúnniń eń ystyq ýaqytynda dalada uzaq júrmeýge, kóbirek sý ishýge jáne densaýlyqqa muqiiat qaraýǵa keńes beredi.
Degenmen sinoptikter jaz boiy tek aptap bolmaitynyn da aitady. Shilde men tamyz ailarynda jańbyr jaýyp, naizaǵai oinap, ekpindi jel turýy múmkin.
