Resei úshin «tegin» soǵysqan jáne jaralanǵan ózbekstandyqqa elinde bas bostandyǵyn shekteý jazasy taǵaiyndaldy, dep habarlaidy ult.kz.
Termez qalalyq soty Sýrhandariia oblysynyń 30 jastaǵy turǵynyn Resei armiiasy jaǵynda Ýkrainadaǵy soǵysqa qatysqany úshin tórt jarym jylǵa bas bostandyǵyn shekteý jazasyna kesti.
Er adamnyń aitýynsha, ol Reseige tabys tabý úshin barǵan. Alaida esirtki isi boiynsha ustalyp, toǵyz jylǵa sottalǵan. Keiin onyń sózinshe, túzeý mekemesi qyzmetkerleriniń qysymymen Resei Qorǵanys ministrligimen kelisimshartqa qol qoiǵan.
Maidanda jaralanǵannan keiin ózbekstandyq ózine ýáde etilgen aqshanyń tólenbegenin jáne Resei azamattyǵy berilmegenin málimdedi.
