AQSh áskeri dúisenbi kúni Irannyń ońtústiginde «ózin-ózi qorǵaý maqsatyndaǵy soqqylar» jasaǵanyn málimdedi. Bul týraly AQSh Ortalyq qolbasshylyǵy habarlady. Nysanaǵa zymyran ushyrý alańdary men Iran qaiyqtary alynǵan, dep habarlaidy ult.kz Fox News basylymyna silteme jasap.
«AQSh kúshteri búgin Iran kúshteri tarapynan tóngen qaýipten áskerimizdi qorǵaý úshin Irannyń ońtústiginde qorǵanys sipatyndaǵy soqqylar jasady», – dedi AQSh Ortalyq qolbasshylyǵy ókili kapitan Tim Hokins.
Onyń aitýynsha, nysanalardyń qatarynda zymyran ushyrý alańdary men mina ornalastyrýǵa árekettengen Iran qaiyqtary bolǵan.
«AQSh Ortalyq qolbasshylyǵy qazirgi atysty toqtatý rejimi kezinde sabyr saqtai otyryp, óz kúshterin qorǵaýdy jalǵastyrady», – dedi Hokins.
AQSh sheneýniginiń málimetinshe, Irannyń eki qaiyǵy Ormýz buǵazynda mina ornatyp jatqan jerinen baiqalǵan. Sonymen qatar, Irannyń zymyran kesheni amerikalyq áskeri ushaqtardy nysanaǵa alǵannan keiin AQSh áskeri jaýap qaitarǵan.
AQSh áskeri Islam revoliýtsiiasy saqshylary korpýsynyń eki kemesin joiyp, sondai-aq Irannyń Bender-Abbas qalasyndaǵy jer-áýe zymyran keshenine soqqy jasaǵan.
«Bul qorǵanys maqsatyndaǵy soqqylar boldy», – dedi sheneýnik Fox News arnasyna.
Onyń aitýynsha, bul shabýyldar Iranmen aradaǵy atysty toqtatý kelisiminiń buzylǵanyn bildirmeidi. Muny taǵy eki derekkóz rastaǵan.
Osy oqiǵadan keiin dúisenbi kúni Ormýz buǵazy mańyndaǵy birneshe aimaqta jarylystar estilgen. Jarylystardyń biri Irannyń ońtústigindegi Bender-Abbas qalasynda bolǵan.
Sondai-aq strategiialyq mańyzy bar sý jolyna jaqyn ornalasqan Sirik pen Jask mańynda da jarylystar tirkelgen. AQSh ókili qazirgi ýaqytta amerikalyq soqqylardyń «ázirge toqtaǵanyn» málimdedi.
