Qazaqstanda jazǵy demalys jáne mektep kanikýly kezeńinde kólik qatynasynyń qoljetimdiligin arttyrý boiynsha qosymsha sharalar qabyldanýda, dep habarlaidy ult.kz.
Jolaýshylar suranysynyń artýyna bailanysty QR Kólik ministrligi kólik kompaniialarymen birlesip suranysqa ie týristik baǵyttar boiynsha temirjol marshrýttary men áýe reisteriniń sanyn kóbeitýde.
Temirjol tasymaly
2026 jyldyń jazǵy maýsymynda 15 qosymsha temirjol marshrýty uiymdastyrylady. Qosymsha poiyzdar 2026 jylǵy 16 maýsymnan bastap qatynai bastaidy.
Baǵyttar qatarynda Astana, Almaty, Qaraǵandy, Aqtóbe, Semei, Óskemen, Qyzylorda jáne Pavlodar qalalarynan Dostyq pen Balqash sekildi týristik jáne kýrorttyq aimaqtarǵa qatynaityn poiyzdar bar.
Atalǵan sharalar jazǵy kezeńde poiyzdarda shamamen 550 myń qosymsha oryn ashýǵa múmkindik beredi.
Sonymen qatar, jolaýshylar aǵynynyń artýyna qarai qoldanystaǵy poiyz quramdary kezeń-kezeńimen ulǵaitylatyn bolady. Jazǵy maýsymda poiyz quramdary orta eseppen 19–21 vagonǵa deiin kóbeiedi. Al maýsymaralyq kezeńde bul kórsetkish 13–15 vagondy quraidy.
Sondai-aq 2026 jylǵy 1 maýsymnan bastap Qaraǵandy – Balqash baǵyty boiynsha №219/220 jolaýshylar poiyzy iske qosylady.
Áýe tasymaly
2026 jyldyń maýsym-tamyz ailary aralyǵynda Astana – Balqash, Úrjar, Úsharal jáne Almaty – Balqash, Úrjar, Úsharal baǵyttary boiynsha aptasyna 7 reiske deiin qosymsha áýe reisteri ashylady.
Atalǵan baǵyttar boiynsha áýe biletteriniń quny áleýmettik qoljetimdi deńgeide saqtalady — 16 myńnan 20 myń teńgege deiin. Bul kóptegen otbasylarǵa elimizdiń týristik aimaqtarynda jazǵy demalysty qoljetimdi uiymdastyrýǵa múmkindik beredi.
Jalpy, 2026 jyly Qazaqstanda aptasyna 813 reis jiiligimen 60 ishki áýe baǵyty boiynsha turaqty reister oryndalady.
Turaqty áýe marshrýttaryn sýbsidiialaý baǵdarlamasy aiasynda 24 baǵytty, onyń ishinde 16 týristik baǵytty qoldaýǵa 6,4 mlrd teńge kóleminde qarjy qarastyrylǵan.
Qabyldanyp jatqan sharalar ishki týrizmdi damytýǵa, óńirlerdiń kólik qoljetimdiligin arttyrýǵa jáne jazǵy demalys kezeńinde azamattardyń jaily ári qaýipsiz sapar jasaýyna qosymsha múmkindik beredi.
