Petropavlda jol apatynan 12 jastaǵy qyz kóz jumdy. Qaiǵyly oqiǵa 25 mamyr kúni keshke Podgora shaǵyn aýdanynda bolǵan, dep habarlaidy ult.kz.
Soltústik Qazaqstan oblysy politsiia departamentiniń málimetinshe, jol-kólik oqiǵasy saǵat 20:16 shamasynda Potanin kóshesinde tirkelgen.
«24 jastaǵy Porsche Cayenne júrgizýshisi kámeletke tolmaǵan jaiaý júrginshini qaǵyp ketken. Alǵan jaraqattarynan 12 jastaǵy qyz oqiǵa ornynda kóz jumdy. Atalǵan derek boiynsha tergeý júrgizilýde», – dep habarlady politsiia.
Belgili bolǵandai, apat jaiaý júrginshiler ótkeli joq aýmaqta, naqtyraq aitqanda Potanin men Týhachevskii kósheleriniń qiylysynda bolǵan.
Oqiǵadan keiin Podgora turǵyndary bul jol bóliginiń burynnan qaýip týdyryp kele jatqanyn aita bastady. Olardyń sózinshe, atalǵan aýmaqta jaqyn mańdaǵy jalǵyz dúken ornalasqandyqtan, joldy balalar da, eresekter de jii kesip ótedi.
Turǵyndar sondai-aq joldyń eńis bolýy jaǵdaidy kúrdelendiretinin aityp otyr. Áleýmettik jelilerde bul ýchaskede buǵan deiin de jaiaý júrginshiler qatysqan jol oqiǵalary bolǵany týraly pikirler jariialanǵan.
Qazir oqiǵanyń barlyq mán-jaiyn tergeýshiler anyqtap jatyr.
Politsiia jol qozǵalysyna qatysýshylardy saq bolýǵa shaqyrdy.
«Jol qozǵalysyna qatysýshylardy qaýipsizdik talaptaryn qatań saqtaýǵa, jolda muqiiat bolýǵa jáne jol erejelerin buzbaýǵa shaqyramyz», – dep málimdedi vedomstvo.
