«Qazgidromet» RMK málimetinshe, 21 mamyr kúni Qazaqstannyń birqatar óńirinde qolaisyz aýa raiy kútiledi. Bul týraly ult.kz saity QR Tótenshe jaǵdailar ministrligine silteme jasap habarlaidy.
Sinoptikterdiń boljamynsha, eldiń soltústik jáne ortalyq aimaqtarynda aýa temperatýrasy kúrt tómendep, túngi ýaqytta úsik júrýi múmkin.
Sonymen qatar respýblikanyń basym bóliginde nóser jańbyr jaýyp, naizaǵai oinaidy, ekpindi jel soǵyp, kei jerlerde iri burshaq túsýi yqtimal.
Al batys jáne ońtústik-batys óńirlerde shańdy daýyl turyp, aptap ystyq saqtalady dep kútilýde.
Mamandardyń aitýynsha, jaýyn-shashynǵa qaramastan, elimizdiń kóptegen aimaǵynda joǵary órt qaýpi saqtalyp otyr.
Osyǵan bailanysty QR TJM turǵyndarǵa aýa raiy týraly eskertýlerdi qadaǵalaýǵa jáne órt qaýipsizdigi talaptaryn qatań saqtaýǵa keńes berdi.
Qutqarýshylar ásirese tabiǵat aiasynda ot jaqpaýǵa, qurǵaq shóp pen qoqysty órtemeýge shaqyrdy.
