Кеңес Одағы Батырының ұлы атанған Анатолий Бирюков Мәскеу мен Чехов тұрғындарының үрейіне айналды. «Балалар аңшысы» деген лақап атқа ие болған маньяк бір айдың ішінде бес сәбиді ұрлап, зорлап, өлтірген. Тергеушілер ұзақ уақыт бойы оны іздеп, бүкіл Мәскеу полициясын аяғынан тік тұрғызды. Алайда қандықол қылмыскердің ұсталғаны әкесі генерал әрі Кеңес Одағының Батыры Николай Бирюков үшін ауыр соққы болды, деп хабарлайды ult.kz.
Бетіндегі тыртық тағдырын өзгертті
Анатолий Бирюков 1939 жылы Мәскеу облысындағы Чехов қаласында дүниеге келген. Оның әкесі Николай Бирюков — Ұлы Отан соғысының ардагері, генерал-лейтенант әрі Кеңес Одағының Батыры еді. Ол ұлын қатал тәртіппен тәрбиелеп, болашағынан зор үміт күтті.
Алайда Анатолийдің балалық шағында болған оқиға оның өміріне үлкен із қалдырды. Сегіз жасында әкесінің патрондарын бөлшектемек болған бала жарылыс салдарынан ауыр жарақат алып, бетінде өмір бойы кетпейтін тыртық пайда болды. Кейін ол бұл жараны жұртқа қайнаған суға күйіп қалғанынан деп түсіндіріп жүрген.
Тыртықтан кейін көршілері оны мазақтай бастаған. Соның әсерінен Анатолий тұйықталып, адамдардан алшақтай түсті. Соған қарамастан мектепте жақсы оқып, ұстаздарының мақтауына ие болды. Әкесінің жолын қумай, слесарь мамандығын меңгеріп, құрылыс саласында жұмыс істеді. Кейін отбасын құрып, екі қыздың әкесі атанды.
Алғашқы қылмыстары жазасыз қалды
Бирюковтың балаларға деген қауіпті әуестігі 1971 жылы байқала бастады. Ол балалар емханасының жанында тұрған арбамен бірге сәбиді алып кетпек болған. Анасы дер кезінде байқап қалып, шу көтерген соң ер адам ұсталды. Бірақ Бирюков өзін «қараусыз қалған балаға сабақ болсын деп әкеттім» деп ақтап шыққан. Полицейлер оған сеніп, босатып жібереді.
Бір жылдан кейін ол тағы бір баланы ұрламақ болып қолға түсті. Кей деректерде оның үш жылға сотталғаны айтылса, кей мәліметте жазадан құтылып кеткені көрсетіледі. Осы оқиғадан кейін әйелі онымен ажырасып кеткен.
Мәскеуді дүрліктірген қанды қылмыстар
1977 жылдың күзінде Бирюков қайтадан қылмысқа кірісті. Алғашқы құрбаны — үш айлық қыз бала болды. Маньяк баланы қараусыз тұрған арбадан алып кетіп, подъезге кіргізген. Нәрестенің жылағанынан қорыққан ол сәбиді пышақтап өлтіріп, қашып кеткен.
Бірақ бұл оның соңғы қылмысы болмады. Араға үш күн салып тағы бір үш айлық қыз жоғалып кетті. Бір айдан кейін оның денесі қоқыс арасынан табылған. Тергеушілер екі қылмыстың да бір адамның қолымен жасалғанын түсінгенімен, нақты күдіктіні анықтай алмады.
Кейін тағы бір сәби ұрланды. Бұл жолы Бирюков зейнеткер әйелдің қолындағы баланы жұлып алып қашқан. Бірнеше күннен кейін зорланған сәбидің денесі табылды. Осыдан кейін Мәскеуде балаларын қараусыз қалдырған ата-аналар арасында үрей күшейді.
Маньякты қалай ұстады?
Полиция маньяктың фотороботын жасап, іздеуді күшейтті. Бирюков аңдудың көбейгенін түсініп, қылмыстарын туған жері Чеховта жалғастырмақ болды. Онда да екі сәби ұрланып, кейін өлі күйінде табылды.
1977 жылдың 21 қазанында ол тағы бір қызды ұрламақ болған кезде анасы байқап қалып, айғай көтереді. Қуғыннан құтылу үшін Бирюков сәбиді жерге тастап, қашып кетеді. Бала аман қалғанымен, куәгерлер оның түрін анық көріп үлгерген. Осыдан кейін жасалған фоторобот тергеушілерді нақты күдіктіге алып келді.
Көп ұзамай полиция Бирюков жұмыс істейтін құрылыс мекемесіне барып, қызметкерлерден оның кім екенін анықтайды. Маньяк сол күні өз үйінде ұсталды. Тергеу кезінде ол бес сәбиді өлтіргенін мойындап, қылмыстарын егжей-тегжейлі айтып берген.
Әкесінің реніші
Анатолий Бирюков алғашында әкесі өзін құтқарып қалады деп сенген. Николай Бирюков та бастапқыда ұлының мұндай қылмысқа барғанына сенбей, оған тәжірибелі адвокат жалдаған. Алайда сот процесі барысында дәлелдер толық расталған соң, генерал көпшілік алдында ұлынан бас тартты.
Сараптама Бирюковты есі дұрыс деп таныды. Сот оны өлім жазасына кесті. Маньяк бірнеше рет өзіне қол жұмсамақ болғанымен, әрекеттері сәтсіз аяқталған. Кейін ол кешірім сұрап түрлі органдарға өтініш жазғанымен, бәрі кері қайтарылды.
Анатолий Бирюков 1979 жылдың 24 ақпанында атылды. Ол 40 жасқа толғаннан кейін көп ұзамай өлім жазасына кесілді.
