Фото: ашық дереккөз
Үкімет отырысында ҚР Ұлттық банкінің төрағасы Тимур Сүлейменов ұлттық валютаның ағымдағы бағамына түсініктеме берді, деп хабарлайды Ult.kz.
Ол жыл басынан бері теңге бағамы бір АҚШ доллары үшін 512,57 теңгеге дейін, яғни 2,4%-ға нығайғанын атап өтті.
«Бағамның ағымдағы динамикасы негізінен жүргізіліп жатқан дезинфляциялық саясат шеңберіндегі орташа қатаң ақша-несие шарттарына байланысты. Бұл теңгелік активтердің тартымдылығын шетелдік инвесторлар арасында да арттыра түсті. Осылайша, резидент емес тұлғалардың ҚР мемлекеттік бағалы қағаздарға (МБҚ) салған портфельдік инвестицияларының көлемі жыл басынан қараша айына дейін шамамен 750 млрд теңгеге, ал қараша айында 340 млрд теңгеге ұлғайды», — деді Тимур Сүлейменов.
Оның айтуынша, ұлттық валюта бағамын қолдау Ұлттық банктің шетел валютасын сатуы есебінен де қамтамасыз етілуде. 2025 жылдың басынан қараша айына дейін Ұлттық қордан бюджеттік трансферттер шеңберінде $7,8 млрд сатылды, бұл ретте соның орнын толтыру мақсатында алтын сатып алу жөніндегі операциялар көлемі $6,1 млрд-ты құрады.
Сондай-ақ Тимур Сүлейменов Халықаралық жалпы резервтер осы жылдың қараша айының соңында $125,7 млрд құрап, жыл басынан бері 20,1%-ға өскенін мәлімдеді.
Ол Ұлттық банктің алтын-валюта резервтері 35,5%-ға ұлғайып, $62,1 млрд, Ұлттық қордың активтері 8,1%-ға ұлғайып, $63,6 млрд болғанын атап өтті.
«Қорға түсетін түсімдер сомасы жыл басынан бері 3,6 трлн теңгені, ал Ұлттық қордан республикалық бюджетке берілетін трансферттер көлемі 4,9 трлн теңгені құрады. Осы жылдың 11 айында Ұлттық қордың инвестициялық кірісі 13,7%-ды немесе $8,2 млрд-ты құрады», — деді Тимур Сүлейменов.
