Фото:dalanews.kz
Мәжілісте "Жер қойнауы және жер қойнауын пайдалану туралы" кодекске түзетулер таныстырылды. Түзетулерді талқылау барысында Мәжіліс депутаттары Бақтықожа Ізмұхамбетов пен Альберт Рау шарпысып қалды, - деп хабарлайды Dalanews.kz.
Депутат Бақтықожа Ізмұхамбетов заң жобасындағы нормаға қатысты дауға араласты. Норма бойынша Геология комитетінің геологиялық ақпаратты жинау, сақтау, есепке алу, жүйелеу және қамтамасыз ету жөніндегі функциялары мемлекеттік органнан алынып, акционерлік қоғам (АҚ) ретінде құрылатын ұлттық операторға берілмек.
Депутат Ізмұхамбетов жер қойнауын пайдалану саласындағы ұзақ жылдық тәжірибесіне қарамастан, бұл мәселе Үкіметтің қарауына оның қатысуынсыз жіберілгеніне наразылық білдірді. Ол әріптестерінің кейбірі лоббистік мүдделерге қызмет етіп отырғанын да айтып қалды. Оған қоса келісім рәсімдері бұзылғанына байланысты айыптады.
Ал Альберт Рау бұл түзетулер Президент Қасым-Жомарт Тоқаевтың тапсырмалары шеңберінде әзірленгенін және барлығы заңға сәйкес жасалғанын мәлімдеді.
Талқылау барысында Ізмұхамбетов: "сөздеріме жауап беремін", - десе, депутат Рау: "Мені мемлекет мүдделерін бұзды деп ешкім айыптай алмайды", - деп жауап берді. Осылайша, заң жобасын талқылау депутаттардың арасында шиеленіс тудырып, пікір қайшылығына алып келді.
Айта кетейік, бұл құжатта Мемлекет басшысының тапсырмаларын іске асыру бойынша «Жер қойнауы және жер қойнауын пайдалану туралы» кодекске өзгерістер мен толықтырулар енгізу көзделген. Түзетулер аясында жер қойнауын пайдаланудың бірыңғай порталы пайда болады.
Бұл платформа арқылы жер қойнауын пайдалануға лицензияларды алғашқы өтінім қағидаты бойынша беру көзделеді. Сонымен қатар, жер қойнауын пайдаланудың мемлекеттік қорын басқарудың қазіргі екі кезеңдік бағдарламасын алып тастап, аукциондық жүйе енгізу ұсынылып отыр. Осы арқылы процестердің ашықтығы мен тиімділігін арттыру көзделген.
482 рет оқылды
