Фото: tengrinews.kz
Мәжіліс депутаты Ерлан Саиров Мемлекет басшысы Қасым-Жомарт Тоқаевтың билікке келген алты жылында атқарған жұмысына қатысты пікір білдірді, деп хабарлайды Ult.kz.
Депутат Е.Саиров Қ.Тоқаев ел дамуына елеулі саяси өзгерістер әкелгенін атап айтты.
"Президенттің өткен алты жылдағы қызметіне көз жүгіртсек, ең алдымен мемлекет дамуына үлес қосқан саяси реформаларын атауға болады. Қ.Тоқаев 2019 жылы билікке келгенде-ақ саяси реформаларсыз елдің әлеуметтік-экономикалық дамуының беріктегін қамтамасыз ету мүмкін емес екенін мәлімдеген. Ал сол саяси өзгерістерді жүзеге асыру үшін Ұлттық қоғамдық сенім кеңесі құрылды. Бұл кеңес арқылы өзгерістердің белгілі бір сценарий жасалды. Яғни Президенттің кейбір өкілеттігін Парламентке беру, билік тармақтары арасындағы балансты нақтылау сынды бірқатар өзгеріс жолдары нақтыланды", – дейді Мәжіліс депутаты.
Сондай-ақ ол 2022 жылғы конституциялық реформалар еліміздің саяси бағытын түбегейлі өзгертіп, мүлдем басқа арнаға бұрғанын атап өтті.
Депутат Саиров сонымен қатар шекаралық аудандарды дамыту мәселесі өзекті болып тұрған өте күрделі кезеңде өмір сүріп жатқанымызды жеткізді.
"Еліміздің территориялық тұтастығы – өте маңызды стратегиялық мәселе. Осы проблеманы шешу үшін Президент Қ.Тоқаев шекаралық аудандарды дамытуға қатысты заңды қарастыру жөнінде Үкіметке тапсырма берді. Бұны негізінен «Amanat» партиясының фракциясы ұсынып отыр. Осы мәселе шешімін табар болса, 65 шекаралық ауданның әлеуметтік-экономикалық дамуына серпін бермек. Шекаралық аудандардың елді-мекендері бүгінде интернетке, телеарналарға, әлеуметтік нысандарға қолы жетпей отыр. Осы олқылықтың бәрін біз осы заңның аясында шешудің кешенді шараларын қарастыруымыз керек", – деді Е.Саиров.
1215 рет оқылды
