23 қар, 2022 сағат 19:40

Тасмағамбетов жаңа қызметке тағайындалды

Иманғали Тасмағамбетов Ұжымдық қауіпсіздік туралы шарт ұйымының бас хатшысы лауазымына тағайындалды, деп хабарлайды "Ұлт ақпарат".

"2023 жылдан бастап, алдағы үш жылда ҰҚШҰ бас хатшысының міндетін Қазақстан өкілі Иманғали Тасмағамбетов атқарады", - деді Пашинян сессия барысында.

Айта кетейік, ол - ұйымның жоғары әкімшілік лауазымды тұлғасы саналады және ұйым хатшылығына басшылық жасайды.

2020 жылдың 1 қаңтарынан бұл қызметті Беларусь елінің өкілі - генерал-лейтенант Станислав Васильевич Зась атқарып келген.

Иманғали Нұрғалиұлы Тасмағамбетов 1956 жылы 9 желтоқсанда Гурьев (қазіргі Атырау) облысында дүниеге келген.

1991 жылдан - ҚР Жастар ісі жөніндегі мемлекеттік комитетінің төрағасы. 1993 жылдан - ҚР Президентінің көмекшісі. 1995 жылдан - ҚР Премьер-министрінің орынбасары.

1997 жылдан - ҚР Премьер-министрінің орынбасары - Білім және мәдениет министрі.

1997 жылдан - ҚР Президент Әкімшілігі басшысының орынбасары, ұйымдастыру-бақылау бөлімінің меңгерушісі.

1998 жылдан - ҚР Президентінің бірінші көмекшісі. 1999 жылдан - Атырау облысының әкімі. 2000 жылдан - ҚР Премьер-Министрінің орынбасары.

2002 жылдан - ҚР Премьер-Министрі. 2003 жылы - ҚР Мемлекеттік хатшысы.

2004 жылы ҚР Президенті Әкімшілігінің басшысы болып тағайындалды. 2004 жылдың желтоқсан айынан 2008 жылдың сәуіріне дейін - Алматы қаласының әкімі.

2008 жылғы сәуір айынан бастап - Астана қаласының әкімі. 2014 жылдың қазанынан ҚР Қорғаныс министрі болды.

2016-2017 жылдары - ҚР Премьер-Министрінің орынбасары.

2017 жылы Қазақстанның Ресейдегі Төтенше және Өкілетті Елшісі болып тағайындалды.

Ал 2019 жылы 18 желтоқсанда Мемлекет басшысы Қасым-Жомарт Тоқаевтың Жарлығымен Иманғали Нұрғалиұлы зейнет жасына толуына байланысты Қазақстан Республикасының Ресей Федерациясындағы Төтенше және Өкілетті Елшісі қызметінен босатылған еді.