03 қар, 2021 сағат 15:47

Шымкентте сұйытылған газды контрабандалық жолмен сатқан кәсіпорын директоры сотталды


Қаржылық мониторинг агенттігінің Шымкент қаласы бойынша аумақтық департаментінің қызметкерлері сұйытылған газ контрабандасы дерегінің жолын кесті.

Бұл туралы ҚазАқпарат ҚР Қаржылық мониторинг агенттігінің баспасөз қызметіне сілтеме жасап хабарлайды. 

Тергеу 2020-2021 жылдар кезеңінде Шымкент қаласы кәсіпорындары бірінің директоры Г.Черкасова белгісіз тұлғалардан сұйытылған газды олардың шығу заңдылығын растайтын құжаттарсыз сатып алғанын анықтады.

Содан кейін Г. Черкасова Өзбекстан мен Тәжікстанға 146 миллион теңгеден астам сомадағы салмағы 966 тоннадан асатын сұйытылған газды заңсыз экспорттаған.

ЕАЭО кедендік шекарасы арқылы шығару кезінде ол жалған шарттар мен тауардың шығу тегі туралы құжаттарды пайдаланды.

Тергеу барысында құжаттарды қолдан жасау және жалған көрсетілген компаниялармен өзара есеп айырысудың болмағандығы расталды.

«Г.Черкасоваға 4,3 миллион теңге көлемінде айыппұл салынды. Сондай-ақ, азаматшадан сот контрабандалық тауардың құнын өндіріп алмақ», - делінген хабарламада.