Шығыс Қазақстан облысында мониторингілік топтар рейд шараларын жалғастыруда, деп хабарлайды "Ұлт ақпарат".
Қазіргі уақытта өңірде 128 мониторингілік топ жұмыс істеуде. Олардың мақсаты – карантин кезіндегі шектеу шараларының сақталуын бақылау. Шығыс Қазақстанда коронавирустың таралу қарқыны артып, облыс «қызыл аймақта» тұрса да, кейбір азаматтар әлі де заңға бағынбауда.
22 қарашадан 23-іне қараған түнде Өскемен және Семей қалаларында кезекті рейд жүргізілді. Соның нәтижесінде Өскемендегі «Red Bulls» түнгі клубы, «Солнечная» моншасы мен Семейдегі «Печки-лавочки» кешенінде ШҚО Бас мемлекеттік санитарлық дәрігері бекіткен шектеулердің бұзылғаны тіркелді.
«Мониторингілік топ келген кезде түнгі клубта әлеуметтік қашықтықты сақтамаған 70-тен астам адам болып, сауналар мен моншаларда дастархан жайылып, ондаған адам көңіл көтергені белгілі болды. Осыған орай құқық қорғау органдары аталған мекеме басшыларын әкімшілік жауапкершілікке тарту мақсатында санитарлық-эпидемиологиялық бақылау органдарына тиісті материалдар жіберді», - делінген ШҚО Ақпарат орталығы таратқан мәліметте.
953 рет оқылды
