24 мам, 2022 сағат 16:56

Сарқандағы қыз өлімі: қылмысқа қатысты жаңа деректер жарияланды

Алматы облысы Сарқан аудандық соты Facebook парақшасында қызын өлтірген анасы мен ағасының ісіне қатысты жаңа деректерді жариялады, - деп хабарлайды "Ұлт ақпарат".

Сот ақпараты бойынша, 8 ақпанда әйел ағасымен бірге таксимен қызын алып келе жатып, жолда түсіп қалған.

"Сол кезде ағасына тумасынан аурушаң және есепте тұрған баласын қарай алмайтынын, көргісі келмейтінін айтып, оны өлтіру керек екені туралы ұсыныс жасаған. Келіспеген жағдайда өзіне-өзі қол жұмсайтынын жеткізген. Ағасы қарындасының сөзіне келісіп, баланы өлтіруге алдын ала сөз байласқан. Кішкентай қызды өлтіруге бағытталған ойын іске асыру үшін қала сыртында орналасқан, бұрынғы зауыт маңындағы қоқыс төгетін жердің еңісіне қарай түсіп, дәрменсіз баланы жерге жатқызып қылқындырып өлтірген. Баланың бақилық болғанына көз жеткізіп, мәйітті жасырып, төбешіктің үстінде сырттай бақылап тұрған қарындасын алып, оқиға орнынан бой тасалағандары анықталды", - дейді соттың баспасөз қызметіндегілер.

Сотқа дейінгі тергеп-тексеру органы соттан күдіктілерге қатысты бұлтартпау шарасы ретінде күзетпен ұстауды санкциялауды сұраған.

"Күдіктілер жасаған қылмысын мойындап, "үйқамақ" ретінде бұлтартпау шарасын сұрады", - делінген хабарламада.

Сот ҚР ҚПК-нің 55, 146-148-баптарын басшылыққа ала отырып, қыздың анасы және ағасына қатысты 2 ай мерзімге күзетпен ұстау түрін санкциялау бойынша қаулы шығарды. Қаулы заңды күшіне енген жоқ.

Еске салайық, 17 мамырда Алматы облысы Сарқан ауданында қоқыс үйіндісінен 4-5 жасар қыздың мәйіті табылған еді. Баланың анасы 19 жастағы жергілікті тұрғын болып шыққан. Оның айтуынша, қызы 2017 жылы дүниеге келген. Ол церебральді сал ауруына шалдыққан, сондай-ақ, балада туа біткен ақыл-ой кемістігі болған.