Фото: Parlam.kz
Мәжіліс депутаты, Экономикалық реформа және өңірлік даму комитетінің мүшесі Темір Қырықбаев Қасым-Жомарт Тоқаев президент болғалы ел саясатына көптеген өзгерістер әкелгенін айтты, деп хабарлайды Ult.kz.
Депутат қандай реформа болсын, оның сәтті жүзеге асуы өзімізге тікелей байланысты екенін де айтты. Ол өзінің мәслихат депутаты бола жүріп, Мәжіліске сайланғанын да еліміздің саяси жүйесіндегі жетістік деп бағалайды.
"Мәселен кезінде мен мәслихат депутаты болғанмын. Менің Мәжіліске депутат болып келем деген мүлдем ойымда жоқ еді. Бірақ мен Жаңа Қазақстанның қағидаларына, орнап жатқан әділеттілікке арқа сүйеп, сеніп артып сайлауда бағымды сынап көрдім. Міне, осылайша өзім халықтың арасынан Түркістан облысынан сайлауға түсіп, жеңіп шықтым. Бұл – саяси реформа ретінде ерекше айтылатын бірінші жетістік", – дейді Қырықбаев.
Сондай-ақ ол Тоқаев билікке келгелі еліміз қол жеткізген келесі жетістік ретінде шетел асқан заңсыз активтердің елге қайтарылғанын атады.
"Заңсыз иемденіп, шетел асқан активтерді қайтару бойынша табанды жұмыс жүргізіліп, нәтижесінде екі триллион теңгеге жуық қаражат елге қайтты. Мұның қызығын ел көріп жатыр, әрине. Мәселен, «Жайлы мектеп» жобасы аясындағы білім ұяларының, түрлі әлеуметтік, медициналық нысандардың құрылысы осы игі жұмыстың арқасында жандана түсті", – деп сөзін жалғады Мәжіліс депутаты.
Одан бөлек, бастауыш сыныптардың оқушыларын тегін ыстық тамақпен қамту ісі де осы күнге дейін өзекті болып келгеніне тоқталған мәжілісмен мұғалімдердің жалақысы да едәуір өскенін атап өтті.
"Осыдан алты жыл бұрын мұғалімдердің жалақысы үш есе, төрт есе көтеріледі десе сенбейтін едік. Қазір Әділетті Қазақстан идеясының мүмкіндіктерінің арқасында халықтың барлық мұқтаждықтарын тікелей айта аламыз. Парламентте көптеген заң жобасына бастамашы болып жүрміз. Сол сияқты мұмдай мүмкіндік бізді біраз жетістікке жетелеп келе жатыр", – деді Т.Қырықбаев.
Сонымен қатар ол күні кеше Көкше төрінде өткен Ұлттық құрылтайдың төртінші отырысында да, Президент сан саланың мәселесін көтеріп, әлеуметтік-экономикалық дамуымыздың нақты бағыттарын айқындап бергеніне тоқталды.
Еске сала кетсек, бүгін Мәжілістің жалпы отырысында Мемлекет басшысының ел тізгінін қолына алған сәттен бергі жүзеге асырып келе жатқан саяси реформалары туралы, яғни Президенті Қ.Тоқаевтың саяси реформаларын іске асыру – мемлекеттік құрылыстың жаңа тарихи кезеңі туралы Мәжіліс Төрағасы Ерлан Қошанов баяндама жасап, артынша депутаттар талқыға салды.
Палата спикері өз баяндамасында осыдан тура үш жыл бұрын, дәл осы залда Мемлекет басшысы Қасым-Жомарт Тоқаев халыққа тарихи Жолдауын жариялағанын атап өтіп, ол уақыт әлем үшін де, еліміз үшін де алмағайып та күрделі сынақтардың кезеңі болғанын еске салды.
735 рет оқылды
