17 мам, 2022 сағат 14:03

Референдумға қанша адам қатыса алады – сайлау комиссиясының мәліметі

© Sputnik / Абзал Калиев

Конституциялық өзгерістерге арналған республикалық референдумға 12 миллионға жуық адам қатыса алады. Бұл туралы орталық сайлау комиссиясының төрағасы Нұрлан Әбдіров мәлімдеді, деп хабарлайды Sputnik Қазақстан.

Комиссияның бүгінгі отырысында 5 маусымдағы референдумға қатысатын адамдардың саны пысықталған болатын.

"Референдумды ұйымдастыру мен өткізу жөніндегі науқан жаңа кезеңге аяқ басты. Учаскелік референдум комиссиялары жұмысқа толығымен кірісті. Барлығы 10 013 референдум учаскесі іске қосылады. 15 мамырдағы ақпаратқа сүйенсек, республикалық референдумға қатысуға құқығы бар азаматтардың тізіміне 11 722 536 адам енгізілген", - деді Әбдіров.

Оның айтуынша, 20 мамырдан бастап кез келген адам тұрғылықты жері бойынша тізімде өз атын тексере алады. Ал қандай да бір өзгеріс енгіземін десе, учаскелік референдум комиссиясына өтініш жазуға мүмкіндік бар. Ондай өтініштер сол күні бірден қаралады.

Сондай-ақ, орталық сайлау комиссиясы республикалық референдумда дауыс беруге арналған бюллетеньдердің санын бекітті. 28 мамырға дейін барлығы 11 839 761 бюллетень шығарылады.