2025 жылдың 8 желтоқсанында Qarmet компаниясы дамуындағы жаңа кезеңнің екі жылдығын атап өтеді — бұл компанияның технологиялық жаңаруына және өндірістік әлеуетін нығайтуға арналған маңызды уақыт болды.
Осы аралықта тау-кен металлургия кешені процестерді тұрақтандырудан ауқымды жаңғыртуға көшіп, даму бағдарламасын елдің өзекті өнеркәсіптік басымдықтарымен үйлестірді. Бұл жұмыс Қазақстан Республикасы Президенті Қасым-Жомарт Кемелұлы Тоқаев қойған міндеттерге сай жүзеге асырылуда.
Компанияның жетістіктері
Екі жыл жедел өсу кезеңі болды. Қатты болат өндірісі 22%-ға, көмір концентратының шығарылымы 26%-ға, ал темір кені концентраты 32%-ға артты. Компания жөндеу жұмыстарын күшейтіп, өндірістік тізбектің аса маңызды учаскелерін қалпына келтірді, жабдықтар мен коммуникацияларды жаңғыртты.
Бұл қадамдар өндіріс жұмысын тұрақтандыруға және ірі жобаларды жүзеге асыруға негіз қалауға мүмкіндік берді.
Металлургия комбинатын газдандырудың алғашқы кезеңінің аяқталуы өнеркәсіптің экологиялық трансформациясындағы ең маңызды қадамдардың бірі болды. Домна өндірісі бірнеше онжылдықта алғаш рет толықтай табиғи газға көшті, бұл қоршаған ортаға түсетін жүктемені айтарлықтай азайтты.
Комбинаттың басқа да цехтары алдағы уақытта газ желісіне қосылуды күтуде.
2025 жылы еңбек қауіпсіздігіне ерекше назар аударылды. Компания шахталары қазір заманауи қызметкерлерді позициялау жүйесімен және жерасты мен жерүсті процестерін біріктіретін жаңартылған цифрлық диспетчерлеумен жабдықталды. Бұл шаралар жағдайды нақты уақыт режимінде жедел бақылауға мүмкіндік беріп, өндірістегі тәуекелдерді айтарлықтай төмендетті.
Биыл компания тау-кен жұмысшыларына арналған өнеркәсіптік медицинаны қайта жаңғыртып, Қарағанды қаласында тегін мамандандырылған қызмет көрсететін клиникалық-диагностикалық орталық ашты.
Қазақстан Республикасының Премьер-министрі Олжас Бектенов биыл маусым айында кәсіпорынға келіп, атқарылған шаралардың маңыздылығын атап өтіп, компания қол жеткізген прогреске тоқталды:
«Қазір жаңа ұлттық инвестор жаңғыртуға қомақты қаражат салып жатыр. Шахтада бейнебайланыс, газ және сейсмодатчиктер, шахтерлерді позициялау жүйесі енгізілуде. Осындай қарапайым нәрселер – жекелеген авариялық сигналдар мен бейнебайланыстың өзі — бұрын мүлдем болмаған», – деді Үкімет басшысы.
Цифрландыру жыл басымдықтарының біріне айналды: өндіріске өнеркәсіптік аналитика жүйелері, жасанды интеллект және цифрлық модельдеу енгізілуде. Жабдықтар предиктивті бақылауға көшіріліп, технологиялық процестердің онлайн-мониторинг желісі құрылуда, негізгі агрегаттардың цифрлық егіздері әзірленіп жатыр. Бұл апаттылықты азайтып, өндірістің тиімділігін арттырады және жүйелі әрі терең жаңғыртуға технологиялық негіз қалайды.
Жаңа қуаттар мен жаңа мүмкіндіктер
2025 жыл ауқымды құрылыс жұмыстарының басталуымен де ерекшеленді. Компания 65 жыл пайдаланылған агрегаттарды алмастыратын №8–9 жаңа кокстеу батареяларын салуға кірісті. Олар жылына 1,5 млн тонна құрғақ кокс өндіруге мүмкіндік береді. Ерекше мәнге ие жоба — 15-тен астам өнім түрін шығаратын көмірхимия өндірісінің көптен күткен іске қосылуы.
Сонымен қатар ыстық мырыштау және полимерлі жабындар желісінің, сортпрокат станының құрылысы басталды. Бұл жобалар жоғары қосылған құны бар металл өндіруге жол ашады.
Компания премиум сегментке арналған болат шығарып, экспорттық әлеуетін айтарлықтай арттыра алатын жаңа құю-прокат кешенін салуды да жалғастырып жатыр — бұл болашақтың жоғары технологиялық өндірісі болмақ.