02 шіл, 2021 сағат 20:05

Путинцева жұптық сында Уимблдон турнирін жеңіспен бастады

Қазақстандық Юлия Путинцева жұптық сында Уимблдон турнирін жеңіспен бастады, деп хабарлайды "Ұлт ақпарат".

Қазақстандық теннисші ресейлік Анна Калинскаямен бірге алғашқы айналымда аустралиялық Саманта Стосур – америкалық Коко Вандевегемен шеберлік байқасты.

Бірінші партияда қазақстандық-ресейлік жұп тай-брейкте әбжілдік танытты – 7:6 (7:3).

Екінші сетте әлдеқайда басымдылық танытты – 6:3.

Сағат жарымға жуық уақытқа созылған матч барысында Ю.Путинцева мен А.Калинская 1 эйс жасап, 5 брейк-пойнтты түгел пайдаланды. Қарсыластары 10 брейк-пойнттың төртеуін ғана өз есептеріне жаза алды.

Қазақстандық-ресейлік жұп үшінші айналымға шығу үшін осы жарыстың бірінші ракеткалары, чехиялықтар Барбора Крейчикова – Катерина Синяковамен таласады.

Тағы бір қазақстандық Зарина Дияс аустралиялық Арина Родионовамен бірге екінші айналымда ресейлік Варвара Грачева – грузиялық Оксана Калашниковаға 3:6, 1:6 есебімен жол берді.

Ерлер арасында жұптық сында қазақстандықтар Александр Бублик пен Александр Недовесов тартысты матчта бразилиялықтар Рафаэль Матос –Тьяго Монтейродан 4:6, 6:3, 12:13 (4:7) есебімен ұтылып қалды.