Президент Ұлытау облысының әкімі Дастан Рыспековті қабылдады

Фото: Ақорда

Мемлекет басшысы Қасым-Жомарт Тоқаев Ұлытау облысының әкімі Дастан Рыспековті қабылдап, өңірдің әлеуметтік-экономикалық дамуы туралы есеп алды, деп хабарлайды Ult.kz.

Әкім баяндамасында негізгі көрсеткіштердің айтарлықтай өскені атап өтілді:

• Өнеркәсіп өндірісі өткен жылы 8%-ға артты;
• Құрылыс жұмыстарының көлемі 28%-ға ұлғайды;
• Тұрғын үйді пайдалануға беру көрсеткіші 30%-ға жоғарылады;
• Өңірге 226 миллиард теңгеден астам инвестиция тартылған, оның 89%-ы жеке инвестицияларды құрайды;
• Жалпы сомасы 940 миллиард теңгелік инвестициялық пул жасақталған;
• Биыл құны 138 миллиард теңгеге тең 17 жоба жүзеге асырылмақ.

Кездесу барысында облыстағы қауіпсіздік және әлеуметтік мәселелер де талқыланды.

• Президентке қауіпті өндіріс орындарында еңбек ететін жұмысшылардың қауіпсіздігін қамтамасыз ету бағытында атқарылып жатқан шаралар туралы баяндалды. Бұл жұмыстар әкімдік пен Үкіметтің бірлескен әрекетімен жүргізілуде.
• Дастан Рыспеков жақында «Қазақмыс» корпорациясының кенішінде орын алған апат салдарынан қаза тапқан шахтерлердің отбасыларына көрсетілген көмектер туралы есеп берді.

Мемлекет басшысы бірқатар тапсырма берді:

• Көлік-логистикалық әлеуетті арттыру;
• Инфрақұрылымды жаңғырту;
• Халыққа сапалы медициналық қызмет көрсету;
• Таза ауызсумен қамтамасыз ету;
• Экологиялық мәселелерді шешу.