- Павлодар облысында кейбір шенеуніктер өңірге инвесторларды тартудың орнына, миллиондаған айыппұлмен және жоғары салықтармен «қорқытып» жатыр.
Бұл туралы жылдың қорытынды жиналысында облыс әкімі Болат Бақауов мәлім етті, деп хабарлайды pavlodarnews.kz.
- Әкімдерге бір сұрақ қойғым келеді. Араларыңда биыл бір инвесторды тартқандарың бар ма? - ,деп сұрады өңір басшысы. Ешқандай нәтиже көріп тұрған жоқпын. Кейбіреулері инвесторларды тартудың орнына керісінше шошытып қойған. Мысалы, СЭЗ «Павлодармен» болған жағдайды естеріңізге түсіріп көріңіз. Олар құрылыс уақытында пайдаланылған жерлерге 20 миллион теңге салық төлеуі тиіс еді. Біз миллиардтаған қаражатпен жұмыс істеп жүргенде, осындай сомадағы салық бойынша үлкен шу шыққан. Ертіс ауданында 10 жыл бойы жұмыс істемей тұрған элеваторды жөндеп, қайта іске қосқан «Кахалонг-Астық» ЖШС бір жыл ғана шаруашылыққа берілген жерлерді пайдаланбағаны үшін 17 миллион теңгеге айыппұл салынды. Ал, Ақсу қаласында шетелден инвестор келіп, жылыжай салған. Оның әкелген құрылғыларын кеденнен өткізу үшін облыстық мемлекеттік кіріс департаменті басшысы Төлеген Сәрсембаевтың көмегіне жүгіндік. Осындай мәселелерден кейін біздің аймаққа кім келгісі келеді. Қолұшын созудың орнына оларға түрлі кедергі жасаймыз.
Болат Бақауов жиналыс кезінде аудан әкімдеріне тағы да инвесторларды тарту жөнінде ескертті. Бұдан басқа, аймақ басшысы келесі жылы ЭКСПО-ға келетін бизнесмендермен келіссөз жүргізу керек екенін алға тартты. - Көрмеде Павлодар облысының инвестициялық жетістіктері көрсетілетін болады, - деді Болат Бақауов. "Ниет білдірген азаматтардың барлығын облысқа әкеліп, кәсіпорындармен таныстыруға дайынбыз. Өз кезегінде инвесторлар бізден қызықты ұсыныстарды күтіп отыр".
2111 рет оқылды
