Мәжіліс Төрағасы Нұрлан Нығматулин Мемлекет басшысы Қасым-Жомарт Тоқаевтың «Egemen Qazaqstan» газетінде жарияланған «Тәуелсіздік бәрінен қымбат» атты мазмұнды мақаласына орай өз пікірін білдірді, деп хабарлайды "Ұлт ақпарат".
Нұрлан Нығматулин атап өткендей, 2021 жыл – біз үшін ерекше. Себебі, осы жылы біз ата-бабаларымыз ғасырлар бойы аңсаған, қасиетті тәуелсіздігіміздің 30 жылдығына қадам бастық.
Мәжіліс Төрағасының айтуынша, мақалада мемлекетіміздің қалыптасу, даму, өркендеу жолы «Бағдар мен белес», «Таным мен тағлым», «Қоғам мен құндылық» және «Ұлағат пен ұстаным» деп аталатын төрт ауқымды бағыт қамтыла отырып, «Отыз жылда біз қандай жетістіктерге жеттік?», «Келер ұрпаққа қандай елді аманаттаймыз?», «Мемлекеттігімізді нығайта түсу үшін тағы не істейміз?» деген сұрақтардың айқын жауабы көрсетілген.
Президент атап өткендей, тарих тұрғысынан алғанда, отыз жыл – көзді ашып жұмғандай қас-қағым сәт. Дегенмен, бұл көптеген халықтар үшін қиындығы мен қуанышы, дағдарысы мен дамуы алмасқан тұтас дәуір деуге болады. Біз де осындай жолдан өтіп келеміз.
Палата төрағасының айтуынша, алғашқы онжылдықта Елбасымыз Нұрсұлтан Назарбаевтың басшылығымен мемлекеттік нышандарымыз белгіленіп, билік жүйеміз қалыптасты. Сондай-ақ «Қазақстан -2030» стратегиясын қабылдадық. Екінші онжылдықта мемлекетіміздің тұғыры нығайып, экономикалық әлеуетіміз артқанын, үшінші онжылдықта «Қазақстан – 2050» стратегиясын қабылдап, озық дамыған отыз елдің қатарына қосылуды жоспарлап отырғанына тоқталды.
«Осы кезеңдерде білім, денсаулық, әлеуметтік жағдай, рухани байлығымыз, патриоттық рухымыз, басқа да еліміздің барлық салалары заман талабына сай қарқынды өсіп отырды. Бұл Елбасымыз бастап, Мемлекет Басшысы жалғастырған мақсаты берік, болашағы айқын, сенімі нық қазақстандық үздіксіз даму жолымыз», - деді Нұрлан Нығматулин.
Енді алдағы төртінші онжылдықтағы басты міндет – қуатты ел және кемел халық болу екенін алға тартқан Палата спикері, осы жолда ең басты бағдар білімді ұрпақ екенін айтты. Сонымен қатар жас буынға жан-жақты қолдау көрсете отырып, бәсекелік қабілетін арттыруға баса көңіл бөлінетінін жеткізді.
«Мемлекет басшысының мақаласы – елім, жерім дейтін, тәуелсіздікті қорғауға, сақтауға үлес қосуға тиіс әрбір азамат үшін ақыл қалта сияқты айқын бағдар деуге болады. Сонымен бірге, бүкіл қоғамды ұйыстыратын құндылықтарды жинақтай отырып, ел бірлігін, ұлт тұтастығын, мемлекет өркениетін қамтамасыз етуге арналған нақты тарихи құжат», - деді Нұрлан Нығматулин.
Мәжіліс Төрағасы атап өткендей, ҚР Президентінің мақаласы әрбір қазақстандықтың жүрегінен орын алып, рухын асқақтатуға серпін беретіні сөзсіз.
648 рет оқылды
_140_110.jpeg)
