09 қар, 2022 сағат 16:57

Назым Қызайбай Азия чемпионатының қола жүлдегері атанды


Назым Қызайбай Иордания астанасы Амман қаласында бокстан болып жатқан Азия чемпионатында қола жүлдегер атанды, деп хабарлайды ҚазАқпарат.

Күндізгі сессияда Қазақстаннан алғашқы болып рингке екі мәрте әлем чемпионы Назым Қызайбай шықты.

Ол 50 келіге дейінгі салмақта Жапония елінің өкілі, 2020 жылғы Токио олимпиадасының қола жүлдегері Намики Цукимимен жұдырықтасты.

Назым осы чемпионатта ширек финалда моңғолиялық Мунгунсаран Балсанмен қолғап түйістірген болатын. Жекпе-жек тартысты өтіп, төрешілер 3:2 есебімен жеңісті қазақстандық боксшыға берген еді.

Қызайбайдың жартылай финалдық бәсекесі де қызу өтті. Қос боксшы аянып қалған жоқ. Дегенмен төрешілер жеңісті басым дауыспен жапониялық спортшыға берді.

Цукуми финалда вьетнамдық Ти Там Нгуенмен алтын жүлдені сарапқа салады.