Астанада Қазақстан мен Ресей өңiраралық ынтымақтастық форумы аясында өтiп жатқан бизнес-форумда Президент Нұрсұлтан Назарбаев ресейлiк кәсiпкерлерге ел экономикасын әртараптандыру, инвестициялық ахуалды жақсарту үшiн қолға алынған iс-шараларды айтып бердi, деп хабарлайды Baq.kz тiлшiсi.
«Қазақстан экономикасын әртараптандырып, инвестициялық ахуалды жақсарту бағытында қарқынды жұмыс жасап жатыр. Елдiң экономикасына тартылған тiкелей шетелдiк инвестиция көлемi соңғы 15 жылда 260 млрд АҚШ долларын құрады. Осы қаражат есебiнен экономикада жақсы өсiм болды. Дүниежүзiлiк банктiң бизнестi жүргiзудегi жеңiлдiк бойынша Қазақстан 41-шi орында тұр. Бiз экономиканы модернизациялауды жалғастырып жатырмыз», - деп атап өттi Президент.
Мемлекет басшымы «100 қадам» Ұлт жоспары, «Қазақстан-2050» стратегиялық бағдарламасы бойынша ауқымды жұмыс жоспарланғанын айта келе, Қазақстанның әлемнiң дамыған отыз елiнiң қатарына қосылуды көздеп отырғанын еске салып өттi.
«Инвестициялық климат жақсарып келедi. Индустриялық-инновациялық даму бағдарламасы бойынша басымдық берiлген салаларда инвесторлар корпоративтiк табыс, 10 жылға жер, 8 жылға мүлiк салығын төлеуден босатылған. Келiсiмдердiң тұрақтылығына кепiлдiк беремiз. Инвестициялар және даму министрлiгi барлық шетелдiк инвесторлар үшiн «бiр терезе» қағидасы бойынша жұмыс iстейдi. Сондай-ақ, 37 мемлекеттiң елдерi үшiн визалық кедергiлер жойылды. Келесi жылдан бастап бұл тiзiм 56 елге дейiн кеңейтiледi», - дедi Н.Назарбаев.
Бұдан бөлек, Президент өз сөзiнде биылғы жылы ЕАЭО-ның жаңа кедендiк кодексiн әзiрлеу аяқталатынын атап өттi.
«Ол бiздiң елдер арасындағы барлық кедендiк рәсiмдердi айтарлықтай жеңiлдетедi. Бiрыңғай көлiк кеңiстiгiн кезең-кезеңiмен құру бойынша келiсiмге келдiк», - дедi Елбасы.
Сондай-ақ, өндiрушiлер мен инвесторлар үшiн мақсатты түрде ортақ ережелер жасалып жатыр.
«Қазақстан экономикасына қаражат салған ресейлiк бизнес өз үйiндегiдей жағдайда болады деп айтуға болады. Бiз мұны қамтамасыз етемiз», - дедi Н.Назарбаев.
Айта кетсек, Қазақстан мен Ресейдiң өңiраралық ынтымақтастық форумы 2003 жылдан бастап өткiзiлiп келедi. 2015 жылы Сочиде өткен форум «Агроөнеркәсiптiк кешен саласындағы ынтымақтастық және азық-түлiк қауiпсiздiгiн қамтамасыз ету» тақырыбын арқау еткен едi.
Қазiргi кезде Қазақстанда ресейлiктердiң қатысуымен 6453 компания жұмыс iстеп жатыр. Олар мұнай мен газ өндiру, өңдеу өнеркәсiбi, көлiк, байланыс, машина жасау, ғарыш, атом энергиясын бейбiт мақсатта пайдалану сияқты салаларда ашылған.
Ресей Қазақстанның ең iрi сауда әрiптесi болып табылады. Көршiлес елдер арасындағы тауар айналымы 2015 жылдың қорытындысы бойынша 14,57 млрд АҚШ долларын құрады, оның iшiнде экспорт - 4,34 млрд, импорт - 10,23 млрд АҚШ доллары.
2389 рет оқылды
