БҰҰ Бас Ассамблеясының 74-ші сессиясы шеңберінде Азиядағы өзара іс-қимыл және сенім шаралары жөніндегі кеңеске (АӨСШК) мүше мемлекеттер Сыртқы істер министрлерінің бейресми кездесуі өтті, деп хабарлайды "Ұлт ақпарат" СІМ баспасөз қызметіне сілтеме жасап.
Кездесу қатысушылары ағымдағы жылдың маусым айында Душанбе қаласында өткен АӨСШК 5-ші Саммитінің қорытындысын талқылады, ал іс-шараның декларациясында Азиядағы қауіпсіздік пен ынтымақтастықтың негізгі мәселелері жөніндегі кеңес мүшелерінің ұстанымдары мен көзқарастары көрініс тапты, сондай-ақ Қазақстанның Тұңғыш Президенті - Елбасы Нұрсұлтан Назарбаевтың АӨСШК негізін қалаушы ретіндегі жеке рөлі және оның Кеңес әлеуетін арттыруға қосқан елеулі үлесі атап өтілді.
АӨСШК-тегі Қазақстанның алдағы төрағалығына ерекше назар аударылды. ҚР Сыртқы істер министрі Мұхтар Тілеуберді 2020-2022 жылдары Қазақстанның төрағалық етуге кеңесте арналған өтінімін бірауыздан қолдағаны үшін АӨСШК мүше мемлекеттеріне алғыс білдірді.
Делегация басшылары Қазақстанды АӨСШК-тің келесі төрағасы ретінде құттықтап, кеңес шеңберінде ынтымақтастықты дамытудағы еліміздің жетекші рөлін атап өтті.
Министр өз сөзінде АӨСШК-ті дамыту көзқарасымен және Форумға төрағалық ету кезеңінде Қазақстанның назарын аударатын басымдықтарымен бөлісті. Олардың қатарында – АӨСШК-ті дәйекті институционалдық дамыту, Сенім шаралары каталогының бес өлшемінің шеңберінде Форумның қызметін мазмұнды толықтыру, сондай-ақ басқа да халықаралық және өңірлік институттармен өзара іс-қимылды одан әрі күшейту.
АӨСШК қызметінің қазіргі заманғы сын-қатерлер жағдайында жоғары өзектілігі және зор экономикалық және адами әлеуетке ие Азиядағы қауіпсіздік пен өзара байланысты нығайту үшін өңірлік кооперацияның тиімді платформасы ретіндегі маңыздылығы атап өтілді.
1992 жылғы 5 қазанда Қазақстанның Тұңғыш Президенті – Елбасы Н.Назарбаев Азиядағы қауіпсіздік проблемалары бойынша консенсус негізінде диалог, консультациялар, шешімдер қабылдау және шараларды жүзеге асыру үшін мемлекетаралық форум болып табылатын АӨСШК-ті шақыруға бастама жасады. Бүгінгі таңда АӨСШК-ке Азияның 27 мемлекеті мүше, 8 ел мен 5 халықаралық ұйым бақылаушы болып табылады.
1496 рет оқылды
