Alibaba интернет-корпорациясының негізін қалаушы қытайлық миллиардер Джек Ма Головкин - Альварес жекпе-жегі үшін арнайы Лас-Вегас қаласына барып, Головкинге қолдау көрсеткен, деп хабарлайды ҚазАқпарат тілшісі.
Жекпе-жектен алған әсерін Джек Ма өзінің Weibo әлеуметтік желідегі парақшасында жариялады.
«Алдыңғы күні Лас-Вегаста Головкин - Альварес арасындағы «ғасыр жекпе-жегін» тамашаладым. Бұл менің өмірімде боксты алғаш рет жақын аралықта тамашалауым. Боксшылардың бір-біріне тигізген жұдырығының дауысы, аққан терін жақыннан сезіну басқаша сезім екен. Қазақстандық 36 жасар чемпион GGG-ның жалындаған жас жігітпен ашық айқасы, мені қатты шабыттандырды» -, деп жазды Джек Ма.
Сондай-ақ, Джек Ма адамдарға Головкин сияқты тек алға қарай ұмтылу керек екенін жеткізді.
Еске сала кетейік, бокс жанкүйерлері 2 жыл сарыла күткен Головкинмен Альварес арасындағы «ғасыр жекпе-жегі» 17 қыркүйек АҚШ-тың Лас-Вегас қаласындағы «T-Mobile» аренасында өткен еді. 12 раундқа созылған айқаста боксшылар үш төрешінің 118-110, 115-113, 114-114 есебімен тең түсті.
3002 рет оқылды
