20 қаң, 2023 сағат 12:22

Мәжіліс пен мәслихаттарға сайлау бір күнде өтеді


Сурет ашық дереккөзден алынды

Мәжіліс пен мәслихаттарға сайлау бір күнде - 19 наурызда өтеді. Мұндай шешімді Орталық сайлау комиссиясы қабылдады, - деп хабарлайды Massaget.kz порталы.

"Мәжіліс депутаттарын да, барлық деңгейдегі мәслихаттарға да бір күні, 19 наурызда сайлау өткізу ұсынылады. Біз ОСК мүшелерімен бұл мәселені талқыладық. Облыстардың, Астана, Алматы және Шымкенттің аумақтық сайлау комиссияларына тиіс шаралар қабылдауды тапсырамын", - деді ОСК төрағасы Нұрлан Әбдіров отырыс барысында.

ОСК мүшесі Сәбила Мұстафина өкілеттігі мерзімінен бұрын тоқтатылған мәслихаттар депутаттарының кезектен тыс сайлауын Орталық сайлау комиссиясы Президенттің Жарлығы негізінде тағайындайтынын және мәслихаттар өкілеттігі мерзімінен бұрын тоқтатылған күннен бастап екі айдан кешіктірілмей өткізілуге тиіс екенін айтты.

Тіркеу мерзімі 20 қаңтардан 18 ақпанға дейін өтетіні нақтыланды. Сайлауалды үгіт тіркеу мерзімі аяқталған сәттен басталады және сайлау күнінен бір күн бұрын жергілікті уақыты бойынша сағат 00-де аяқталады - 18 Ақпан 18:00-ден 18 наурыз 00:00-ге дейін.

Осылайша, Парламент Мәжілісі мен мәслихаттар депутаттарын кезектен тыс сайлаудың жалпы ұзақтығы тағайындалған күннен бастап дауыс беру күніне дейін 59 күн болады.