Мемлекеттік бағдарламаларды белсенді іске асырудың арқасында мамыр айында «Еңбек» мемлекеттік бағдарламасы аясында 28,5 мың қазақстандық жұмысқа орналасты. Ал, «Жұмыспен қамтудың жол картасы» бағдарламасы бойынша 14,8 мың адам жұмыспен қамтылды, деп хабарлайды "Ұлт ақпарат".
«Еңбек ресурстарын дамыту орталығы» АҚ мамандарының айтуынша, короновирус пандемиясы салдарынан 16 наурыздан бастап, сәуір айының соңына дейін енгізілген карантин кезеңінде Электрондық еңбек биржасында бос жұмыс орындарының саны 3 есе азайған (2020 жылдың алдыңғы айларымен салыстырғанда).
Бірінші кезекте жұмыс орындарының төмендеуі қызмет көрсету секторында, сауда, көлік және өнеркәсіп салаларында тіркелді. Алайда, карантиндік шаралар жеңілдетілгеннен кейін еңбек нарығының жанданып, мамыр айының басынан бастап экономиканың барлық салаларында жұмыс берушілер тарапынан сұраныс деңгейінің біртіндеп қалпына келуі байқалуда.
Мамандар еңбек нарығының жандануына «Жұмыспен қамтудың жол картасы» және «Еңбек» мемлекеттік бағдарламалары ерекше рөл атқарып отырғаныдығын атап өтті.
«Дағдарысқа қарсы шаралар еліміздің барлық аймақтарында өз әсерін беруде. Ағымдағы жылдың сәуір айынан бастап және 19 мамырдағы жағдай бойынша Жұмыспен қамту жол картасы аясында 44,7 мың жұмыс орны құрылып, оларға жұмыспен қамту орталықтары арқылы шамамен 14,8 мың адам жұмысқа орналастырылды. «Еңбек» бағдарламасы аясында ағымдағы жылдың 4 айында 128,5 мың адам қамтылды, оның ішінде 118,3 мың адам уақытша және тұрақты жұмысқа орналастырылды, 676 адам оқуға жіберілді, 1,4 мың адам шағын несие алды. Ал, 1-19 мамыр аралығында ғана «Еңбек» бағдарламасына 30,3 мың адам қатысып. оның 28,5 мыңы жұмыспен қамтылған», - дейді «Еңбек ресурстарын дамыту орталығы» АҚ департаментінің директоры Жұлдыз Пернебаева.
Бос жұмыс орындарын орналастыру бойынша Ақмола, Қарағанды, Қостанай, Павлодар, Алматы, Маңғыстау, Шығыс Қазақстан облыстарының және Нұр-сұлтан қалаларының жұмыс берушілері белсенділік танытуда.
Құрылысшы-монтажшылар, құрылысшы-әрлеушілер, сырлаушылар, Денсаулық сақтау саласындағы кәсіби мамандар, орта медициналық және фармацевтикалық қызметкерлер, металл өңдеу, жабдықтарға қызмет көрсету жұмысшылар, жүргізушілер мен операторлар мамандықтары бойынша бос жұмыс орындарының саны өскен.
1107 рет оқылды
