Еңбек және халықты әлеуметтік қорғау министрі Мәдина Әбілқасымова өзіне қатысты барлық сыннан қорытынды шығаратынын мәлім етті.
Үкімет отысырынан шыққан министрге журналистер «қоғамдағы наразылыққа байланысты отставкаға кетесіз бе?» деп сауал жалдады.
Алайда Мәдина Әбілқасымова сұраққа жалтара жауап берді.
«Біз сынды естіп тұрамыз. Ең бастысы, бұл сыннан қорытынды шығарамыз. Жағдайды барынша жақсартуға тырысамыз. Жүзеге асырылып жатқан мемлекеттік саясаттың тиімділігін арттыруға бағытталған шаралар қабылданады, - деді ол.
Осы орайда министр ҚР Үкіметінің жанынан құрылған ел азаматтарының табысын арттыру, тұрмыс сапасын жақсарту, әрі көпбалалы отбасыларға қолдау шараларын күшейту жөніндегі жұмыс тобы аясында көпбалалы отбасыларды баспанамен қамтамасыз ету мәселесі бақылауда болатынын мәлім етті.
«Қазіргі уақытта жергілікті атқарушы органдармен бірлесіп, барлық ұсыныстарды жинаудамыз. Индустрия және инфрақұрылымдық даму министрлігі сол арқылы арнайы есебін шығаруда. Барлық талаптарды жинап жатырмыз. Атқарушы органдарға ғана емес біздің министрлікке де көпбала аналар келіп жатыр. Бүгін де кездесу болады. Ұсыныстардың барлығын жұмыс тобы аясында шешуге тырысамыз», - деді ол.
Айта кетейік, 4 ақпанда Астанадағы Көктал тұрғын үй алабында шағын баспана өртеніп, 5 бала көз жұмды. Кейін әлеуметтік желіде Еңбек және халықты әлеуметтік қорғау министрі Мәдина Әбілқасымованың жұмысына қатысты сын айтылды.
Ал Мадина Әбілқасымованың өзі қайғыдан қан жұтып отырған отбасыға сол күні барып, көңіл айтқан екен, бірақ ауырып жүргендіктен марқұм қыздардың жаназасына қатыспапты. Трагедиядан кейінгі алғашқы түсініктемені оның орынбасары Светлана Жақыпова жариялаған болатын. Министрлік басшысы 6 ақпан күні де үкімет отырысына келмеді.
Кейін орталық коммуникациялар қызметіндегі Мадина Әбілқасымова қатысуы тиіс брифинг басталар алдында кейінге қалдырылды.
3348 рет оқылды
