Фото: primeminister.kz
Көкшетау қаласының прокуратурасы халықтың әлеуметтік осал топтарына арналған көппәтерлі тұрғын үйлерді жалған пайдалануға беру фактісін анықтады, деп хабарлады бас прокуратура.
Бұл көппәтерлі тұрғын үйлер бюджет қаражаты есебінен тұрғызылған.
"2023 жылы Көкшетау қаласы құрылыс бөлімінің бұрынғы басшысы объектілердің құрылысы іс жүзінде аяқталмаған кезде қаражат аудару арқылы екі көппәтерлі тұрғын үйді (140 пәтер) пайдалануға қабылдау актісіне қол қойғаны анықталды", - деп жазылған хабарламада.
Заңсыз әрекеттердің салдарынан мемлекетке 90 млн теңгеден астам шығын келтірілген.
Аталған факті бойынша қала прокуратурасы лауазымды адам өзiнiң қызмет бабын пайдалана отырып жасаған, кінәліге сенiп тапсырылған бөтен мүлiктi аса iрi мөлшерде иемденiп алу немесе талан-таражға салу, яғни жымқыру бабымен көзделген қылмыстық құқық бұзушылық белгілері бойынша сотқа дейінгі тергеп-тексеруді бастады.
532 рет оқылды
