5-ші Дүниежүзілік көшпенділер ойындарында Көкпардан финалдық ойын өтіп, Қазақстан құрамасы Қырғызстан командасын 5:4 есебімен жеңіп, алтын жүлдеге ие болды, деп хабарлайды "Ұлт Ақпарат" ҚР Туризм және спорт министрлігі, «Ұлттық және ат спорт түрлері орталығының» баспасөз қызметіне сілтеме жасап.
Алғашқы таймда 1:3 есебімен Қырғызстан құрамасы алға шықты. Екінші таймда есеп теңесіп, 4:4 есебімен аяқталды. Үзілстен кейін «алтын салым» салуға 10 минут уақыт беріліп, шешуші салымды қазақстандық көкпаршы салды. Тартысқа толы бәсеке 5:4 есебімен аяқталып, қазақстандық көкпаршылар Дүниежүзілік көшпенділер ойындарының алтын жүлдесіне ие болды.
«Көшпенділер ойындарының оқу-жаттығу жиынын жыл басында бастадық. Елді қуантамыз деген мақсатымыз болған еді. Қырғыз ағайындармен кездесу қиын болады деген едім. Расында солай болды. Десе де ел намысын қолдан бермей, үмітті ақтадық», – деді көкпардан ұлттық құраманың бас бапкері Ақылбай Манкеев.
922 рет оқылды
