Келер жылы Нұрғиса Тілендиевтің туғанына 100 жыл толады. Аты аңызға айналған дәулескер күйші, дирижер, композиторды қазіргі жастар таный ма?
ULT.KZ тілшісі бұл сұрақты Тілендиевтің 100 жылдығына арналған концертте оның қызы, «Отырар сазының» көркемдік жетекшісі және бас дирижері Дінзухра (Динара) Тілендиеваға қойдық.
«Нұрғиса Тілендиевтің есімі халықтың жадында мәңгі сақтаулы. Мен оған алаңдамаймын. Нұрғиса Тілендиевтің есімі ешқашан ұмытылмайды. Жастарды қазір өнерге тарту керек. Оның жолы - заманауи репертуарларды орындау керек. Бүгінгі концертте өздеріңіз осыған куә болдыңыздар, естідіңіздер», -дейді Дінзухра Тілендиева.
Дінзухра Тілендиева әкесінің қазақ өнеріндегі орны мен оның шетелдегі танымалдылығы туралы пікір білдіріп, былай деді:
«Біз шетелге шыққан сайын Нұрғиса Тілендиевтің шығармаларын орындаймыз. Шетелдегі жанкүйерлеріміз қазақ өнерін, Нұрғиса Тілендиевті жақсы біледі», -дейді Дінзухра Тілендиева.
29 қарашада композитордың өзі құрған «Отырар сазы» фольклорлық-этнографиялық оркестрі Нұрғиса Тілендиевтің туған күнін жоғары деңгейде атап өту мақсатында, Астанадағы Роза Бағланова атындағы «Қазақконцерт» мемлекеттік концерт ұйымының үлкен залында композитордың 100 жылдығына арналған «Отырар сазы шақырады» концертін өткізді.
Айтулы мерекені атап өтудің маңызы зор. Өйткені, қазақтың біртуар азаматы көзінің тірісінде еліміздің өнерінде өшпестей із қалдырған. «Отырар сазы» Астана төрінде композитордың жадын қайта жаңғыртты деуге болады.
Концерт жоғары деңдейде орындалып, елорда тұрғындары мен қонақтары екі оркестрдің және халықаралық байқаулардың лауреаты Е.Рахмадиев атындағы мемлекеттік академиялық филармониясының Камералық хорының орындауында Нұрғиса Тілендиевтің қазақ музыкасының алтын қорына енген шығармаларын тыңдады. Сондай-ақ көрермендерге ерекше шығармашылық эксперимент ұсынылды. Көне қазақ халық аспаптарының үнімен қатар, «Vivo per lei», «The Prayer», «Melodramma», «Remember», «She» және «Шиндлер тізімі» фильмінен композициялар орындалды.
«Нұрғиса Тілендиевтің 100 жылдығына дайындық үстіндеміз»
«Отырар сазы» ұлттық өнермен қатар ұлттық аспаптардың үнін әлем аренасы деңгейіне жеткізу үшін қызмет етіп жүрген еліміздегі танымал оркестрлердің бірі. Ұлттық құндылықтардың дәріптеушісі «Отырар сазының» өміршеңдігі де осы болса керек. Алдағы жылдарда оркестр, репертуарындағы туындылар қатарын көбейтуді жоспарлап отыр, одан бөлек оркестр келер жылы кең көлемде атап өтілетін Нұрғиса Тілендиевтің 100 жылдығына дайындық үстінде. Бұл туралы Дінзухра Тілендиева бөлісті.
«Біздің репертуардағы туындылар жаңарып отырады. Оның қатарын кеңейтіп оған заманауи репертуарлар қосу керек. Алға қойған жоспарлар көп, солардың бірі келер жылы Нұрғиса Тілендиевтің 100 жылдығы, соған дайындық үстіндеміз», - деді Дінзухра Тілендиева.
Сахнада елімізге танымал өнер иелері қызмет көрсетті. Көрермендер жаңа жарық технологиялары арқылы жүзеге асатын керемет шоуды тамашалады. Сахналық жабдықтар музыка сиқырын сезінуге мүмкіндік беретін ерекше атмосфера сыйлады.
«Отырар сазы шақырады» концертінің дирижерлері. Н. Тілендиев атындағы АФЭО «Отырар сазының» көркемдік жетекшісі және бас дирижері – ҚР еңбек сіңірген қайраткері, «Құрмет» және «Парасат» ордендерінің иегері Дінзухра Тілендиева, Н. Тілендиев атындағы АФЭО «Отырар сазы» оркестрінің дирижері – ҚР еңбек сіңірген әртісі, «Құрмет» орденінің иегері Жалғасбек Бегендіков болды. Ал, Симфониялық оркестрдің дирижері қызметін «Құрмет» орденінің иегері Арман Жайым атқарды. Көркемдік жетекшілер. Симфониялық оркестрдің көркемдік жетекшісі және бас дирижері – ҚР Халық әртісі, «Құрмет» орденінің иегері Абзал Мұхитдин Камералық хордың көркемдік жетекшісі және бас дирижері – ҚР еңбек сіңірген қайраткері Гүлмира Құттыбадамова.
Айта кету керек, «Отырар сазы» фольклорлық-этнографиялық оркестріне 1980 жылы Нұрғиса Тілендиевтің өзі негіз салған. Басында «Отырар сазы» қазақ филармониясының жанынан ансамбль ретінде құрылған. Бүгінде оркестрдің репертуарында халық күйлері, «Кеңес», «Сары өзен», «Сал күрең», халық композиторларының шығармалары, «Қосбасар», «Саржайлау», Тәттімбеттің «Сылқылдағы», «Ерденнің күйі», Ықыластың «Қамбар батыры», М. Төлебаевтың «Еске алуы», Нұрғиса Тілендиевтің «Ата толғау», «Қош керуені», К. Күмісбековтың «Қорқыт күйі», «Фараби сазы», тағы басқа танымал туындылармен қатар, шетелдік танымал композициялар бар.
Бекболат Мұхтар
Фотолар: ұйымдамстырушылардан
15700 рет оқылды_140_110.jpg)
