18 мам, 2020 сағат 09:24

Қазақстандықтар карантинде азық-түлікке қанша ақша жұмсағаны белгілі болды

Қазақстан халқы сәуірде барлық шығынның жартысынан астамын азық-түлікке жұмсады, деп хабарлайды Sputnik Қазақстан.

Мониторинг жүргізетін Ranking.kz агенттігінің ақпаратына сәйкес, карантин кезінде бөлшек сауда екі есеге төмендеді.

"Сәуірде Қазақстан бойынша дүкендер, базарлар және басқа да бөлшек сауда орындары 495,7 миллиард теңгеге (1,1 миллиард доллар) сауда жасады, бұл өткен жылдың сәуірімен салыстырғанда 40,9%-ке аз. Инфляцияны ескере отырып, сауда көлемінің нақты төмендеуі жылына 44,7%-ті көрсетті", - деп хабарлады агенттік.

Қаңтар-сәуірде бөлшек сауда көлемі 2,87 триллион теңгені (6,5 миллиард доллар) құрады, бұл өткен жылдың алғашқы төрт айымен салыстырғанда 5,9%-ке аз. Бұл ретте сауда көлемінің нақты азаюы 11,8%-ке жетті.

Әдетте жалпы азық-түлік тауарлары бөлшек сауданың жалпы көлемінің үштен бір бөлігін құраса, карантин режимі сақталған сәуірде бөлшек сауданың жалпы көлеміндегі азық-түлік тауарларының үлесі бірден 51,5%-ті немесе 255,4 миллиард теңгені (580 миллион доллар) құрады. 2020 жылдың алғашқы төрт айында қазақстандықтардың барлық сатып алуларының 36,6%-і – азық-түліктің үлесі.

Айта кетейік, Қазақстан Ұлттық банкі инфляция дәлізі 4-6% деген болжам жасады. Алайда инфляцияның жылдық деңгейі сәуірде 6,8%-ті құрады, наурызда 6,4% және 2019 жылдың сәуірінде 4,9%.