Қазақстандық суретші Сәуле Дүйсенбинаның «Objective ornament II» атты туындысын Лос-Анджелестің LACMA атты өнер музейі арнайы сатып алды, деп хабарлайды "Ұлт ақпарат".
«Бұл картина ХVIII ғасырда өмір сүрген испан суретшісі Франсиско Гойяның туындысына ұқсас. Сурет 2018 салынды, онда параллельді әлем мен қазақтың ұлттық бас киімі арқылы біздің қазіргі өміріміз бейнеленген. Мен өзім Америкада галлерияда жұмыс істеймін. Ағымдағы жылдың көктемінде Нью-Йоркте ортаазиялық бірнеше суретшінің топтық көрмесі өтті. Оның ішінде Қазақстаннан менің туындыларым, сонымен қатар Өзбекстан мен Қырғызстан суретшілерінің еңбегі болды. Көрмені саланың кәсіби мамандарымен қатар өнерге қызығушылар тамашалады, менің жұмысым көрмеден соң сатылды. Өзім кәсіби суретшімін және бұл салада біраз жылдар еңбектеніп келемін. Негізгі тақырыбым кескіндеме, графика және аннимация. Жұмысым барысында барлық заманауи техника мен технологиялар мүмкіндігін қолданамын», - дейді С. Дүйсенбина.
Автордың айтуынша, Лос-Анджелестің өнер музейі сатып алған картина бұған дейін Қазақстанда көрмеге қойылған.
«Ұлы даланың тарихы» атты көшпелі көрменің аясында бұл туынды Шымкент, Тараз және Талдықорған қалаларында көпшіліктің назарына ұсынылды. Талдықорғанда өткен көрме кезінде жұмысқа қарсы болып, оны көрмеден алып тастауды сұрағандар болды. Оның себебі қазақтың ұлттық бас киімін киген қыздың аяғының ашық болуы. Яғни, қазақтың бас киімін қорлады деген желеу. Содан соң маған туындымның көздеген мағынасын түсіндіруіме тура келді. Нәтижесінде картина көрменің соңына дейін тұрды», - дейді ол.
788 рет оқылды
