18 қар, 2022 сағат 14:13

Қазақстанда жұмыртқа бір жылда 15%-ға қымбаттады

Осы жылдың он айында бірінші санаттағы жұмыртқаның бағасы 14,8%-ға өсті. Energyprom.kz мониторинг компаниясының мәліметінше, қазан айында баға 6,3%-ға қымбаттаған, деп хабарлайды Sputnik Қазақстан.

Бағаның өсу қарқыны жоғары аймақтар: Ұлытау облысы – 19,8%-ға; Павлодар облысы – 14,7%-ға; Қызылорда облысы – 13,6%-ға.

Бағаның қымбаттауы төмен өңірлер ішінде Алматы облысы 0,4% көрсеткішімен көш бастап тұр.

Жиырма облыстың ішінде айлық қарқын бойынша баға тек Алматыда өзгерген жоқ. Жылдық қарқын бойынша жұмыртқа Қызылорда облысында 52,2%-ға, Қостанай облысында 34,1%-ға, Батыс Қазақстан облысында 32,5%-ға қымбаттады. Бұл ретте Алматыда баға, керісінше, 4%-ға, Жетісу облысында 0,4%-ға төмендеді.

Елімізде 2022 жылдың қаңтар-қыркүйек айларында 3,8 миллиард дана жұмыртқа өндірілді, бұл бір жыл бұрынғыдан 5,3%-ға артық.

Өңірлер арасында Солтүстік Қазақстан облысы көш бастап тұр: 559,6 миллион дана жұмыртқа өндірілген және бұл бір жылда 40,7%-ға өсімді көрсетеді. Одан кейін Ақмола (555,5 миллион жұмыртқа, - 7,4%) және Қарағанды (472,9 миллион жұмыртқа, -2%) облыстары тұр.