Қазақстанда коронавирус жұқтырғандар күрт көбейді. 29 маусымда 2016 адамның коронавирус тесті оң шықты. Жартысына жуығы Нұр-Сұлтан мен Алматыдан анықталған.
Бір күн бұрын 1300-ден астам адамның коронавирус тесті оң шыққан еді. Ресми мәлімет бойынша, елде соңғы рет 2000-нан астам науқас 22 мамырда тіркелген.
Қазақстанда "үндістандық штамның" таралып жатқаны жайлы ақпарат шыққалы бері коронавирус жұқтырғандар көбейіп жатыр. Денсаулық сақтау министрлігі өткен аптадан бері науқастар 39 пайызға ұлғайғанын хабарлаған.
Сәрсенбі күні Алматы қаласының әкімдігі қалада "үндістандық штамның үлес салмағы" 78 пайызға жетті деп хабарлады.
Сейсенбі күні Нұр-Сұлтанда 678 адамнан коронавирус анықталды. Бұл - республика бойынша ең жоғары көрсеткіш. Қарағандыда – 302, Алматыда – 253, Батыс Қазақстан облысында – 126, Шымкентте 103 науқас тіркелген. Қалған облыстарда анықталған науқастар жүзге жетпейді.
28 маусымда 83 адамнан пневмонияның коронавирусқа ұқсас түрі (коронавирус пневмониясы) анықталған. Бір күнде 13 адам коронавирустан қайтыс болған.
2020 жылдың наурыз айынан бері елде 423 137 адамның коронавирус тесті оң шыққан. Содан бері 4 349 адам қайтыс болған. 1 тамыздан бері 57 025 адам коронавирус пневмониясына шалдыққан, 3 446-сы қайтыс болған.
30 маусымдағы мәлімет бойынша, елімізде 24 822 адам коронавирус инфекциясынан (23 526 КВИ+ және 1 296 КВИ-) емделіп жатыр. Олардың ішінде 7 453 пациент стационарда, 17 369 науқас амбулаториялық деңгейде ем қабылдауда.
КВИ+, КВИ- шалдыққандардың арасында:
- 493 адамның жағдайы ауыр,
- 103 пациенттің жағдайы өте ауыр,
- 67 науқас ӨЖЖ аппаратында жатыр.
Қазақстанда коронавирусқа қарсы вакцинаның кемінде бірінші дозасын алғандар 3 млн 335 мың адамға жетті. 2 млн адамға вакцинаның екі дозасы салынған. Елде жалпы вакцинаның 5,2 млн дозасы пайдаланылған.
Джонс Хопкинс университетінің мәліметінше, індет басталғалы бері әлемде 181 млн 761 мың адам коронавирус ауруына шалдыққан. 3 млн 937 мың адам қайтыс болған. Коронавирус жұқтырғандар саны жөнінен Қазақстан әлемде 45-орында тұр.
