Қазақстанда «Анашым, біз үйдеміз» тележобасы басталады. Бұл туралы бүгін Орталық коммуникациялар қызметіндегі баспасөз мәслихатында ҚР Ақпарат және қоғамдық даму министрі Дәурен Абаев жария етті, деп хабарлайды ҚазАқпарат тілшісі.
«Әлеуметтік аз қамтылған отбасыларды демеу еліміздегі басты бағыттардың бірі. Мысалы, жыл сайын көпбалалы отбасыларды қолдау мақсатында көптеген мемлекеттік бағдарламалар жүзеге асырылуда. Ағымдағы жылдың өзінде атаулы әлеуметтік көмекпен қатар 40 мың жалдамалы пәтер құрылысына қатысты жаңа іс-шаралар қолға алынды. Ақпарат және қоғамдық даму министрлігі де көпбалалы отбасыларға байланысты бастамаларды қолдауға әрдайым дайын. Осы орайда мемлекеттік ақпараттық тапсырыс аясында «31-арнамен» бірігіп «Анашым, біз үйдеміз» деп аталатын жаңа жобаны көрерменге ұсынып отырмыз», - деді министр.
Осы орайда ол пәтерді жөндеу бүгінгі таңда әсіресе көпбалалы отбасылар үшін ең өзекті мәселелердің бірі болып отырғанын баса айтты.
«Отандық телеөнім арқылы осы мәселенің шешімін табамыз деп ойлаймыз. Пәтерлер мен үйлер толық жаңарып, жобадағы әрбір отбасы мүшелерінің өмір сүруі үшін барынша ыңғайлы баспаналарға айналады. «Анашым, біз үйдеміз» жобасының кейіпкерлерімен де көрермен жан-жақты танысады. Отбасының тұрмысы, тағдыры ешкімді де бей-жай қалдырмайды деп ойламын», - деді Дәурен Абаев.
Айта кетейік, жобаны дайындау бүгін басталды. Оған қатысу үшін өтінімді dom@31.kz электрондық поштасына жіберу немесе +7 7082677326 нөмірі арқылы жоба үйлестірушілеріне байланысу қажет. Ал 11 тамыздан бастап «31-арна» көрермендері әр отбасымен жеке танысып қана қоймай, олардың пәтерлері мен үйлерінің барынша көркейгеніне куә болады.
1870 рет оқылды
