18 қаң, 2023 сағат 12:12

Қазақстан мен Франция қылмыстық істерді бірге тергейді

Фото: Zakon.kz

Мәжіліс "Қазақстан Республикасы мен Франция Республикасы арасындағы қылмыстық істер бойынша өзара құқықтық көмек туралы шартты ратификациялау туралы" Қазақстан Республикасы заңының жобасын қабылдады, - деп хабарлайды Tengrinews.kz порталы.

"Осындай келісімдер қажет. Келісім қылмыс жасағаны үшін күдіктілер мен айыпталушылардың кінәсін дәлелдеуге бағытталған іс әрекеттерін жүргізуді көздейді. Мұндай шаралардың қатарында қамауда отырған адамдарды уақытша ауыстыру да бар", - деді Бас прокурордың орынбасары Әсет Шындалиев.

Оның айтуынша, шарттар тергеудің толықтығын қамтамасыз ету, куәлардан, жәбірленушілерден жауап алу, заттай айғақтарды тәркілеу туралы өтініш жіберуге мүмкіндік береді.

"Мысалы қылмыстық іс бойынша куә немесе жәбірленуші шетелде тұрып жатуы мүмкін. Олардан жауап алу керек. Біздің құқық қорғау органдары өздігінен сол елге барып, тергеу әрекетін жасай алмайды. Сондай-ақ қылмыстық істі тергеуге айғақ заттар, құжаттар, қылмыс құралдары өзге ел аумағында болуы мүмкін. Оны өзіміз барып ала алмаймыз. Сол үшін құқықтық көмек туралы шарттар жасалады. Мұндай шарттар тергеудің толықтығын қамтамасыз ету үшін сұрау жолдап, куәдан немесе жәбірленушіден жауап алуға, заттай айғақтарды тәркілеуге мүмкіндік береді. Шетелдегі тергеу әрекеттері олардың заңнамасына сәйкес шешіледі", - деді ол.

Шыңдалиев атағандай, құқықтық көмек осы сынды мәселелерді шешеді.

"Осыған дейін өзара келісім принципінде жүзеге асырылған. Енді шартта екі жақтың құқықтық міндеттемелері нақты белгіленеді. Жалпы, құқықтық көмек сұрау салу арқылы жүзеге асырылады. Ол заттарды тәркілеу, тінту, банктегі шоттарды анықтау, жауап алу, ақпарат алмасу мен басқа да тергеу амалдарын қамтиды", - деді ол.

Шартқа сәйкес тараптар қылмыстық құқық бұзушылықтарға қатысты кез келген рәсімдерде бір-біріне барынша кеңінен құқықтық көмек көрсетуге міндеттеледі. Шартты іске асыру екі елдің қылмысқа қарсы күрестегі ынтымақтастығының тиімділігін арттырады.

"Халықаралық шарттар туралы" Қазақстан Республикасының Заңына сәйкес Шарт міндетті ратификациялауға жатады, өйткені ол адам мен азаматтың құқықтары мен бостандықтарын тікелей қозғайды.

Аталғандай, шартты ратификациялау кезінде оны іске асыру теріс әлеуметтік-экономикалық және құқықтық салдарларға алып келмейді, сондай-ақ республикалық бюджеттен қосымша қаржы талап етпейді.

Парламент Мәжілісінің тұрақты комитеттері заң жобасы бойынша оң қорытындыларын берді. Депутаттар дауыс беру арқылы аталған заң жобасын қабылдады.