Қазақстан Кәсіпқой футбол лигасы 2020 жылғы маусымның қорытындысы бойынша Olimpbet-Қазақстан чемпионатының үздіктер құрамасын жариялады, деп хабарлайды "Ұлт ақпарат".
Қазақстан Кәсіпқой футбол лигасының (ҚКФЛ) ресми сайтында биылғы футбол маусымының үздіктер құрамы жарияланды. Үздік команда ҚКФЛ серіктесі InStat компаниясының матчтарын статистикалық талдау негізінде құрылды. Сонымен 2020 жылдың үздіктер құрамасы төмендегідей:
Қақпашы: Александр Мокин («Тобыл»).
Тәжірибелі қақпашы 13 матчтың 10-ында қақпасына гол өткізбеген. Мокин 23 соққыны қайтарды. Іс-қимыл индексі – 240.
Оң қапталдағы қорғаушы: Ілияс Әмірсейітов («Қайсар»).
Биылғы маусым «Қайсардың» қорғаушысы үшін сәтті болды. Ол қорғаушылардың ТОП-5 санатына енді. Статистика бойынша 49 рет допқа таласта қарсыластарынан басым түскен.
Орталық қорғаушылар: Раде Дугалич және Нұралы Әліп («Қайрат»).
Дугалич–Әліп жұбы чемпионатта ең тиімді өнер көрсеткендердің қатарында. Ойыншылар бір-бірін толықтырып, мүмкіндігінше сенімді әрекет етті. Раде допқа таластарда озық шықса, жас қорғаушы Нұралы әр ойында сауатты қимылдады. Сонымен қатар Нұралы төрт рет гол соқты. Ұлттық құраманың белді ойыншысы саналады.
Сол қапталдағы қорғаушы: Ғафуржан Сүйімбаев («Қайрат»).
Сүйімбаев қорғаныста да, шабуылда да өзін көрсете білді. Чемпионатта 7 голға мүмкіндік жасады. Ол маусым бойы үздіктер құрамына 8 рет кірген. Іс-қимыл индексі – 265.
Тірек жартылай қорғаушы: Джаба Канкава («Тобыл»).
«Тобылдың» грузиялық футболшысы Джаба Канкава кезекті маусымда сәтті ойнады. Джаба өзі қатысқан жекпе-жектің 62% -ында жеңді және осы көрсеткіш бойынша үздік 3 ойыншының қатарында.
Оң жақ жартылай қорғаушы: Тигран Барсегян («Астана»).
Армениялық ойыншы Барсегян шабуыл шебінде елордалық команданы алға сүйреді. Жоғары жеке шеберлік пен тиімді дриблинг оның айнымас серігі болды. Тигран үш гол соғып, әріптестеріне 5 голдық пас берді.
Шабуылдаушы жартылай қорғаушы: Асхат Тағыберген («Қайсар»).
Тағыберген Қызылорда клубының шабуылдарының негізгі ұйымдастырушысы ғана емес, қорғаныста да жақсы ойнады. Асхат 2020 жылы 4 гол соғып, 2 рет ассистент атанды. Оның екі голы тамыз және қараша айларындағы ең үздік гол болып танылды.
Сол жақ жартылай қорғаушы: Жоао Пауло («Ордабасы»).
Жоао – чемпионаттың үздік орындаушыларының бірі. Шымкенттік клубтың шабуылындағы басты рөлді осы бразилиялық футболшы ойнады. Барлығы 12 гол соғып, турнирдің үздік бомбардирі атанды. Сонымен қатар Пауло бірнеше статистикалық көрсеткіштер бойынша Лигада үздік атанды. Іс-қимыл индексі – 248.
Шабуылшылар: Абат Айымбетов және Вагнер Лав («Қайрат»).
Айымбетов екінші маусым қатарынан ең нәтижелі қазақстандық шабуылшы атанды. 20 матчта ол 10 гол соқты. Абат жаңа ұжымға биыл қосылса да, ойын схемасында өзін жақсы көрсетті.
Вагнер Лав Olimpbet-Қазақстан чемпионатының нағыз сәніне айналды. Жұлдызды бразилиялық жеке шеберлігі жағынан лигадағы ең үздіктердің бірі болды. Ол «Қайраттың» 17 нәтижелі шабуылына қатысты. Статистикалық мәліметтерге сәйкес, Лавтың қоржынында 4 гол, 12 нәтижелі пас және 17 дәл соққы бар. Іс-қимыл индексі – 266.
1387 рет оқылды
