Фото: «Қазаэронавигация» РМК баспасөз қызметі
15 қараша күні Алматыда «Қазаэронавигация» РМК Кәсіби дайындау орталығында әуе қозғалысына қызмет көрсету диспетчерлерін даярлауға арналған жаңа оқу-жаттығу құрылғысы кешені іске қосылды, деп хабарлайды Ult.kz.
АҚШ-та өндірілген «Air Traffic Simulation and Voice Technologies» жаттығу кешенін UFA Inc. компаниясы «Қазаэронавигация» РМК тапсырысы бойынша әзірлеген. Бұл кешен болашақ диспетчерлерді бастапқы даярлаудан өткізіп қана қоймай, жұмыс істеп жүрген мамандардың кәсіби шеберлігін арттыруға да мүмкіндік береді.
"Бұған дейін орталықта ресейлік өндірістегі тренажер қолданылып келген, ол әлі де қолданыста. Алайда биыл біз әлемге танымал UFA Inc. компаниясының арнайы біз үшін әзірлеген заманауи америкалық тренажерін іске қостық.
Бұл кешен әуе қозғалысын басқарудың бес негізгі элементін – жерүсті қозғалысын басқару, мұнара, шеңбер, жақындау және аймақтық орталық (жоғарғы әуе кеңістігі) – бір тапсырма аясында жұмыс істеуге мүмкіндік береді. Әр маман өз орнында отырып, үдерісті үзіп, талқылап, қайта жалғастыра алады. Бұл – соңғы технологияларды қолдана отырып жасалған өте заманауи тренажер. Осы тренажерді іске қосу арқылы біз диспетчерлерге мол білім беру мүмкіндігіне ие болдық", - дейді «Қазаэронавигация» РМК орталығының директоры Нұржан Ахметов.
Фото: «Қазаэронавигация» РМК баспасөз қызметі
Кешеннің техникалық мүмкіндіктері әуежайдағы әуе трафигі мен жердегі қозғалысты имитациялауға арналған. Оқу барысында жасанды интеллект псевдопилоттың орнын басып, радиобайланысты қамтамасыз етеді. Сонымен қатар, кешен виртуалды шынайылық технологиясы арқылы авиадиспетчердің жұмыс орнын барынша дәл бейнелейді.
Жаңа жүйеге Қазақстанның қолданыстағы әуеайлақтары мен әуе кеңістігін қамтитын аэронавигациялық карталар жүктелген. Бұл жабдық Қазақстанда және Орталық Азияда теңдесі жоқ деп танылды.
Фото: «Қазаэронавигация» РМК баспасөз қызметі
Айта кетсек, Кәсіби дайындау орталығы – ИКАО TRAINAIR PLUS Gold бағдарламасының толыққанды мүшесі мәртебесін иеленген Қазақстандағы жалғыз авиациялық оқу орны. Қазір орталық Platinum мәртебесіне қол жеткізуді және Қазақстан, Орталық Азия мен ТМД елдерінің авиация саласындағы жетекші оқу орталығы атануды мақсат етіп отыр.
Нұржан Ахметовтың айтуынша, қазіргі уақытта Кәсіби даярлау орталығында 36 жоғары білікті нұсқаушы жұмыс істейді. Олар да әлемдік оқу орталықтарында оқып, әріптестік тәжірибе алмасады. Биыл орталық 20 жылдығын атап өтуде. Осыған орай Алматыға барлық халықаралық серіктестер шақырылған.
«Қазаэронавигация» Қазақстанның әуе кеңістігінде аэронавигациялық қызмет көрсетуді қамтамасыз етеді. Бұл қызметтің сапасы мен қауіпсіздігін жоғары деңгейде ұстап тұру үшін бізде әуе қозғалысын ұйымдастыру бойынша мыңға жуық қызметкер, RTOS инженерлерінен 500-ден астам маман және метеоқызметте 350-ден астам адам жұмыс істейді. Қазіргі уақытта біз кадрларды даярлау, іздеу және дамыту мәселелеріне ерекше назар аударып отырмыз. Осыған байланысты әлемнің жетекші авиациялық оқу орталықтарымен, мысалы, Ұлыбританиядағы ATS Global, Швециядағы Entry Point North, Франциядағы ENAC, Ригадағы аэронавигация институты және Чехиядағы аэронавигация институтымен тығыз байланыс орнаттық", - деп атап өтті Нұржан Ахметов.
2023 жылы Кәсіби дайындау орталығында 291 адам осы жаттығу кешенінде оқудан өтті. Ал биылғы жылдың алғашқы 9 айында 192 адам дайындықтан өткен. Жаңа тренажер орталықтың нұсқаушыларына болашақ және қазіргі диспетчерлерді екі есе көп оқытуға мүмкіндік береді.
26 рет оқылды
