Қазақстан Республикасының Президенті Қасым-Жомарт Тоқаев елдің жиналуына қатысты сөз қозғалатын болса, оның барлығы рұқсатпен болуы керектігін ескертті. Осы мәселеге қатысты видеоны Facebook парақшасында Президенттің баспасөз хатшысы Берік Уәли жариялады, деп хабарлайды "Ұлт ақпарат".
«Менің түсінігімдегі әділет - заңның салтанат құруы. Мемлекеттік шенеуніктер де, құқық қорғау органдарының қызметкерлері де - барлығы заңға бағынуы керек. Сондай-ақ, заңды ел азаматтары да сақтауы тиіс. Заң бәріне бірдей. Қандай да бір сын айту да заң аясында болуы тиіс. Адамдардың жиналуына қатысты айтар болсақ, ол да рұқсатпен болуы шарт. Сондықтан, мен біздің елде заңдардың сақталатынын қатаң ескертемін», - дейді Қасым-Жомарт Тоқаев.
Айта кетсек, бүгін ҚР Бас прокурорының орынбасары Болат Дембаев «Прокуратура туралы» Заңның 31-бабының тәртібінде үндеу жариялаған болатын.
«Әлеуметтік желілер мен мессенджерлерде 9 мамырда заңсыз митингке қатысуға үгіттеу жүріп жатыр. Бас прокуратура бұдан бұрын осындай заңсыз жариялы акциялар ұйымдастырған және қатысқандар жауапқа тартылатынын ескерткен болатын. Алайда 1 мамырда кейбір азаматтар уәкілетті мемлекеттік органдар қызметкерлері ескертуін елемей, заңсыз митингілерге шығып, әкімшілік жауапқа тартылды. Олардың құқықтық тәртіпке қайшы іс-әрекеттерінен азаматтардың демалуына және тыныштығына қауіп төнді», - делінген үндеуде.
1836 рет оқылды
_80_80.jpg)
