17 жел, 2020 сағат 00:51

Кәсіпқой бокс: Айдос Ербосынұлы чемпиондық белдіктерін қорғап қалды

Тәуелсіздік күні елордадағы Жақсылық Үшкемпіров атындағы жекпе-жек сарайында кәсіпқой бокс кеші өтті, деп хабарлайды "Ұлт ақпарат".

«Көшпенділер шайқасы» атты кәсіпқой бокс кешін «SuleimenPromotions» промоутерлік компаниясы ұйымдастырды.

Бокс кешінде шаршы алаңға шыққан қазақстандық былғары қолғап шеберлері Бек Нұрмаганбет (2-0, 1 КО), Евгений Павлов (2-0, 2 КО), Бекзат Нұрдәулетов (1-0, 1 КО) және Данила Семенов (1-0, 1 КО) қарсыластарын қапы қалдырды.

Сондай-ақ, кештің басты жекпе-жекгінде екінші орта салмақта өнер көрсетіп жүрген қазақстандық кәсіпқой боксшы Айдос Ербосынұлы (14-0-0,9КО) жеңіліп көрмеген ганалық боксшы Исса Самирмен (19-0-0,16КО) қолғап түйістіріп, қарсыласын үшінші раундта техникалық нокаутпен жеңді. Осылайша, Ербосынұлы өзіне тиеселі WBC Asia, WBAInternational және WBO Global титулын сәтті қорғап қалды.

Еске сала кетейік, Айдос Ербосынұлы соңғы рет Минскіде шаршы алаңға шығып, германиялық боксшы Нуху Лавальді (27-8-0,15 КО) төрешілер шешімімен жеңген болатын.